Almatyda HІІІ Ulttyq delfıı oıyndary ótti
ASTANA. QazAqparat - Almaty qalasynda 14-25 jas aralyǵyndaǵy 300-ge jýyq jas ónerdiń 17 túrinen ózara baq synaıtyn kólemdi "Almaty qalasy jastarynyń delfıı oıyndary-2017" baıqaýy ótti, dep jazady Massaget.kz.
Qazaqstan Ulttyq delfıı oıyndary bıyl Almaty qalasy jastar saıasaty máseleleri jónindegi basqarmasynyń qoldaýymen, Almaty jastarynyń Kongresi, Stýdentter Alıansynyń uıymdastyrýymen XIII ret ótkizildi. Oıyndar jas talanttardy taýyp, olardy qoldaý, óskeleń urpaq arasynda mádenı murany nasıhattaý, olarǵa rýhanı, estetıkalyq tárbıe berý, mádenıetaralyq dıalog pen ulttyq ónerdiń damýyna yqpal etýdi kózdeıdi.
Baıqaýda eń úzdik dep tanylǵan jeńimpazdar respýblıkalyq Ulttyq delfıı oıyndaryna Almaty atynan qatysatyn bolady. Ulttyq delfıı oıyndarynda jeńis tuǵyrynan kóringen jastar halyqaralyq delfıı oıyndaryna joldama alady.
Baıqaýdyń nátıjesi boıynsha eń úzdik dep tanylǵan jeńimpazdar: "skrıpka" nomınatsııasy boıynsha - Aqynger Aılın (10-15 jas) men Bekturova Malıka (16-21 jas), "kıim dızaıny" nomınatsııasynda Pernebaeva Gaýhar, dombyra janry boıynsha Shákenbaev Muhamedáli (10-15 jas) men Júleken Jandos (16-21 jas), "dástúrli halyq áni" atalymy boıynsha Erǵalına Balaýsa, "fotosýret" sheberleriniń arasynda Jakaeva Ofelııa arnaıy maqtaý qaǵazymen, baǵaly syılyqtarmen marapattaldy.
Qımylyna kóz ilespes myń buralǵan bıshilerdiń arasyndaǵy básekede bas júldeni "zamanaýı bı" nomınatsııasynda "SAAD" bı toby, "halyq bıi" atalymynda ártúrli jas erekshelikterine oraı, "Sarmat" (10-15 jas aralyǵy) pen "Nurbı" (16-21 jas) bı toptary qanjyǵalaryna baılady.
Endi atalǵan jeńimpazdardyń barlyǵy Almaty qalasynyń namysyn respýblıkalyq Ulttyq delfıı oıyndarynda qorǵaıtyn bolady. Ulttyq delfıı oıyndarynda jeńis tuǵyrynan kóringen jastar halyqaralyq delfıı oıyndarynda elimizdiń atynan óner kórsetedi.
Delfıı oıyndary - qatysýshylar arasynan talantty tulǵalar men erekshe daryndy jastardy iriktep alýǵa baǵyttalǵan, klassıkadan bastap qazirgi zamanǵa deıingi ónerdiń barlyq túrin biriktiretin keshendi baıqaý. Olımpıada oıyndarymen birge ejelgi Grekııa jerinde dúnıege kelip, XX ǵasyrda qaıta jandana bastaǵan delfıı oıyndary búginde álemniń 100-ge tarta memleketinde qoldaý tapqan.
