Almatyda Hazıhan Bókeıhanovtyń 120 jyldyǵy atalyp ótti
S.J.Asfendııarov atyndaǵy Qazaq ulttyq medıtsına ýnıversıtetiniń qabyrǵasynda ótken konferentsııaǵa Hazıhan Bókeıhanovtyń shákirtteri, týystary, sonymen qatar JOO stýdentteri qatysty.
«Ol bizge dáris oqydy. Onyń baısaldy daýysy áli esimde. Bir kúni emtıhannan keıin men onyń kabınetine kirdim, anatomııany úıretkeni úshin alǵysymdy bildirip, onyń muǵaliminiń nemeresi ekenimdi aıttym. Sodan keıin ol meniń baǵalarymdy surady. Men «synaq kitapshamdy» kórsettim, onda «óte jaqsy» degen baǵalar bolatyn. Sonda ol: «Sen emtıhandy orys tilinde tapsyrypsyń, qazaq tilin bilesiń be?», - dep surady. Men: «Iá!», - dep jaýap berdim»,- dep eske aldy H.Bókeıhanovtyń shákirti, dotsent M.Kóshekbaev.
Hazıhan Bókeıhanov – Qazaq memlekettik medıtsına ınstıtýtynyń alǵashqy professorlarynyń biri. Ol Qazaqstannyń eńbek sińirgen dárigeri, «Qurmet belgisi» ordeniniń, túrli medaldardyń ıegeri.
«Ol joǵary bilimdi muǵalim jáne bilimdi ǵalym bola otyryp, kóptegen dárigerler men akademııalyq oqytýshylardy oqytyp, tárbıeledi», - dep qosty professor.
Konferentsııaǵa jınalǵandarǵa, Hazıhan Bókeıhanovtyń ómiri týraly onyń týysy Anastasııa Mámbetalına aıtyp berdi.
«Hazıhan Bókeıhanov 1899 jyly 28 qazanda Batys Qazaqstan oblysy, Orda aýdanynyń Shońaı aýylynda dúnıege keldi. Ol Ábilqaıyr hannyń tikeleı urpaǵy»,- dedi A.Mámbetalına.
Hazıhan Bókeıhanov Anastasııa Mámbetalınaǵa jaqsy dáriger bolý úshin anatomııany jaqsy oqý kerektigi týraly keńes bergen eken. Ol professordy alǵash ret 1963 jyly Almatyǵa jumysqa kelgende kórgen.
«Men oǵan keldim. Aǵashtan salynǵan jeke úıi boldy. Esikti ashyp, bólmege bettegenimde aldymda aq shashty, boıy alasa kelgen, biraq óte ádemi kisi turdy. Ol maǵan biraz qarap turyp: «Áı, sen ákeńe uqsaısyń», - dedi. Men qatty qýandym. Men óz ákemdi ómirimde kórgen emespin. Sodan keıin ekeýimiz kúni boıy áńgimelestik. Ol maǵan óziniń ómiri, týystarym, ata-anam týraly bárin aıtyp berdi. Ol dombyramen ákem jaqsy kóretin birneshe kúıdi oryndap berdi», - dedi Anastasııa Mámbetalına.
Professor Hazıhan Bókeıhanovtyń ákesi Naýsha Bókeıhanov mýzykant, vırtýozdy dombyrashy bolǵan. Qazaq memlekettik fılarmonııasynda jumys isteı júrip, kontserttik is-sharalarmen qatar, jas oryndaýshylardy oqytyp, halyq aspaptar orkestrin qurǵan.
Hazıhan otbasynda jalǵyz ul bolǵan. Ol medıtsına salasyn tańdaǵan. 1915 jyldyń kúzinde tórt jyldyq qalalyq mektepti bitirgen. 1918 jyly Astrahandaǵy feldsher-akýsherlik mektepti támamdap , feldsherlik pýnktiń meńgerýshisi boldy. 1925 jyldary Ordanyń Shońaı, Saıqyn, Tolybaı aýyldarynda súzek, tyrysqaq, oba indeti boıynsha ekspedıtsııalarǵa qatysty. 1930 jyly Astrahan medıtsına ınstıtýtyn bitirdi. 1930 – 1934 jyldary Oral oblysynyń Kaztalov aýdanynda emhana meńgerýshi qyzmetin atqardy. 1934 jyldan ómiriniń sońyna deıin Almaty medıtsına ınstıtýtynda, qalypty anatomııa kafedrasynda aspırant, assıstent, dotsent, professor, kafedra meńgerýshisi (1962 jyldan) bolyp jumys istedi.
Bókeıhanov buǵaq, bezgek, juqpaly teri aýrýlaryn zerttep, olardy emdeý máselelerimen shuǵyldandy. 16-dan astam ǵylymı eńbekteri bar.
