Almatyda haıýanattar baǵynyń qoltyraýyndaryn qyzmetkerler jurttyń kózinshe tamaqtandyrdy
ALMATY. QazAqparat - Almaty qalasynyń Haıýanattar baǵynda alǵash ret qoltyraýyndardy tamaqtandyrý «rásimi» shoý retinde kórsetilmek. Mundaı tásil álemdik tájirıbede bar kórinedi.
«Haıýanattar baǵynyń kóptegen qonaǵy bizdiń qoltyraýyndardy «qýyrshaq» jasandy dep oılaıdy. Jalpy, qoltyraýyn tabıǵatyn salqyn qandy. Kóp qımyldy unatpaıtyn, tábeti aýa raıyna qaraı ashylatyn ań. Ol úshin aýa temperatýrasyn ne tómendetý, ne joǵarylatý kerek. Teledıdardan kórgende olardyń jyrtqyshtyǵyn baıqap, zoobaqta qımylsyz jatqanyna kóp sene bergimiz kelmeıdi. Sondyqtan, biz olardy jurt kózinshe tamaqtandyryp, olardyń qanshalyqty kúshti, jyrtqysh ań ekenin kórsetkimiz keledi», dep habarlady Almaty haıýanattar baǵynyń baspasóz qyzmetinen.
Qoltyraýyndy tamaqtandyrý ár apta saıyn sársenbi kúnderi saǵat 15:00, 16:00-de ótedi. Biraq, onyń tamaqtanýy aýa raıyna baılanysty bolatynyn aldyn ala eskertemiz.
