Almatyda halyqtyń esebinen qaltasyn qampıtqan monopolıster anyqtaldy

ALMATY. QazAqparat - Almaty prokýratýrasy halyqtyń esebinen qaltasyn qampıtyp kelgen monopolısterdi artyq alǵan aqshalaryn qaıtarýǵa májbúrledi, dep habarlaıdy QazAqparat tilshisi.

Qalalyq prokýratýranyń baspasóz qyzmetiniń habarlaýynsha, kommýnaldyq kásiporyndar 6,6 mlrd teńgeni artyq asap qoıǵan.

Prokýrorlyq tekserý barysynda «AlmatyEnergo Sbyt» JShS 1,1 mlrd teńgeni shyǵyn qataryna negizsiz qosyp, elden jınap alǵan. Shyn máninde olardyń mundaı shyǵyn shyǵarmaǵany belgili boldy.

Qalanyń jartysynan kóbin jaryqpen qamtıtyn «Alataý Jaryq Kompanııasy» JShS tótenshe jaǵdaı bolmasa da tarıfti negizsiz kótertken. Sonyń nátıjesinde kásiporyn 2,1 mlrd teńgege baıyǵan.

«Almaty Sý» memlekettik kásiporyn sýdyń normadan tys shyǵyndaryn halyqtyń esebinen jaýyp otyrǵan.

Prokýratýra kásiporyndy 600 mln teńgeni qaıtarýǵa májbúrledi. Kásiporyn sotqa qarsy aryz jazǵanmen, sot prokýratýranyń pozıtsııasyn qoldady.

Sonymen qatar, halyqty sorýda basqa da kásiporyndar qarap qalǵan joq.

«QazTranGazAımaq» AQ 1,3 mlrd teńgeniń tarıftik smetasyn oryndamaǵan. «Almaty jylý jelileri» JShS tutynýshylardan taǵy qosymsha 1,1 mlrd teńge tóleýdi talap etken.

Tekserý nátıjesinde, monopolıst kásiporyndardyń laýazymdy tulǵalary ákimshilik jáne tártiptik jaýapkreshilikke tartyldy.