Almatyda halyqtyń amanatyn arqalaǵan jigit án keshin ótkizdi
ALMATY. 17 aqpan. QazAqparat - Qazaqtyń dástúrli án óneriniń altyn qoryna baǵa jetpes jańa mura qosyldy. Bul búgin Almatydaǵy Qazaqstan Jazýshylar odaǵynyń Ádebıetshiler úıinde ánshi Tileýles Qurmanǵalıevtyń
«Oıqaraǵaı» dep atalatyn alǵashqy án jınaǵynyń tusaýkeserinde aıtyldy.
"Kez-kelgen óner adamynyń óz tyńdarmandarynyń aldynda esep beretin kezi bolady. Búgin kóp jyldan beri oıǵa alǵan án jınaǵym jaryq kórip otyr. Onda kóp tyńdalmaǵan, kóp eshkim aıtpaǵan Jetisý ólkesiniń án murasy toptastyryldy. Halyqtyń amanaty sııaqty úırengen nárselerim, shyndyǵyn aıtqanda, maza bermeı júr edi. Búgin bir júk moınymnan túskendeı boldy", - deıdi T. Qurmanǵalıev.
Serjan Moldasanulynyń qoldaýymen jaryq kórgen bul jınaqqa 24 án enip otyr. Onyń 11-i "Aǵajaı porym", "Aq jaıla", "Ekeýiń-aı", "Jeken jar", "Oılanshy óziń", "Eki-aı kók" sııaqty halyq ánderi bolsa, 13-i Jaıaý Musanyń" Sursha qyz", Balýan Sholaqtyń "Qulan kisines", Kódek Baıshyǵanulynyń "Qyzdar-aý, ıgaı", Shaltabaı Alparulynyń "Shaltabaıdyń áni", Pyshan Jálmendeulynyń "Ǵaıshaǵa", Kenen Ázirbaevtyń "Tik shyrqaý" sııaqty týyndylary.
