Almatyda Halyqtyq sport túrleri boıynsha respýblıkalyq týrnırdiń irikteý jarysy bastaldy (FOTO)
ALMATY. QaAqparat - Almatyda «Dınamo» sport kesheninde Halyqtyq sport túrlerinen QR Prezıdenti N. Á. Nazarbaevtyń kýbogy úshin respýblıkalyq týrnırdiń irikteý jarysy bastaldy.
«Búgingi saıysqa 150-ge tarta adam qatysýda. Olardyń ishinde qala turǵyndary, joǵary oqý oryndarynyń stýdentteri jáne ár túrli mekemelerdiń qyzmetkerleri bar. Talap boıynsha qatysýshylardyń jasy 18-den kem bolmaýy tıis. Jeńimpazdarǵa gramotalar jáne baǵaly syılyqtar tabys etiledi. Sonymen qatar, olar osy aldaǵy shilde aıynda ótetin jalpy qalalyq týrnırge joldama alady. Al ol týrnırde jeńiske jetkender, ústimizdegi jyldyń qyrkúıek aıynda Óskemende bolatyn aqtyq synǵa qatysady», - dedi óz sózinde Almaty qalasy Almaly aýdany ákiminiń mádenıet jáne tilderdi damytý bóliminiń jetekshi mamany, osy týrnırdiń úılestirýshisi Oljas Serikuly.
Básekege qatysýshylar Prezıdenttik kópsaıys, ıaǵnı 100 metrlik jáne 1 shaqyrymdyq qashyqtyqqa júgirý, týrnıkke tartylý jáne sekirý, sondaı-aq asyq atý, voleıbol, shaǵyn fýtbol, qol kúresi, toǵyz qumalaq, kir tasyn kóterý jáne qazaq kúresi boıynsha baqtaryn synaıdy.
«Nur Otan» partııasy janyndaǵy «Jas Otan» jastar qanaty bul sporttyq sharany Almaly aýdany ákimdigimen birlesip, osymen besinshi jyl qatarynan ótkizip otyr. Sharanyń basty maqsat - jastar arasynda salamatty ómir saltyn jáne ulttyq sport túrlerin nasıhattaý.
