Almatyda «Halyqtyq ІRO baǵdarlamasyna» qatysýǵa qyzyǵýshylyq bildirgen turǵyndar sany sońǵy kúnderi kúrt óse bastady
ALMATY. 2 qarasha. QazAqparat - Almatyda sońǵy kúnderi «Halyqtyq ІRO baǵdarlamasynyń» qatysý úshin transfer-agent sanalatyn «Qazposhta» AQ-nyń bólimshelerine ótinish bildirýshiler sany kúrt ósýde.
Bul týraly búgin Almatydaǵy «Aqparattyq-resýrs» ortalyǵynda ótken «Nur Otan» HDP-nyń qoǵamdyq qabyldaýynda aıtyldy.
«Halyqtyq ІRO baǵdarlamasy» el turǵyndarynyń birlesip iri ulttyq kompanııalardyń ıelenýshisi bolýǵa, olardyń damýyna kómektesýge jáne paıdasynyń bir bóligin alýǵa jasalǵan biregeı múmkindik. Otandyq qor naryǵy tarıhyndaǵy eń iri joba boıynsha Qazaqstannyń eń iri 10 kompanııasynyń aktsııalary satylǵaly otyr. Onyń artyqshylyǵy dıvıdentter jáne aktsııalarǵa baǵalardyń ósýi arqyly tabystyń 2 túriniń bolýynda», - deıdi «Nur Otan» HDP-nyń Almaly aýdandyq fılıaly tóraǵasynyń 1-shi orynbasary Aleksandr Bratenkov. Onyń aıtýynsha, alǵashqy kezekte tek Qazaqstan azamattary, odan keıin zeınetaqy qorlary, al ózge ınvestorlar tek ekinshi naryqta ǵana qatysady. A.Bratenkovtyń sózine qaraǵanda, «Halyqtyq ІRO baǵdarlamasynda» eń birinshi bop 6 qarashadan bastap qaramaǵynda Qazaqstannyń barlyq gaz qubyrlary jatqan «QazTransGaz» AQ aktsııalaryn saýdaǵa shyǵarǵaly otyr. Sondyqtan biz bul sharadaǵy basty maqsatymyz - «Halyqtyq IPO» baǵdarlamasyn iske asyrý boıynsha turǵyndar arasynda aqparattyq-túsindirý jumystaryn uıymdastyrý. Onda jurtty tolǵandyrǵan suraqtar aıasynda quqyqtyq kómek kórsetý, olardyń qarjylaı-ınvestıtsııalyq saýattylyq deńgeıin kóterý, qundy qaǵazdar naryǵyndaǵy operatsııalarǵa qyzyǵýshylyǵyn oıatý, sondaı-aq atqarýshy organdar ókilderiniń turǵyndarǵa qatysty máselerdi sheshýdegi baǵytyn aıqyndaý. Óıtkeni qazir álemde halyqtyń 20 paıyzy jumys jasamasa da, qor naryǵy operatsııalaryna qatysý arqyly qundy qaǵazdardan túsken tabys arqyly baqýatty tirshilik keshýde.
