Almatyda halyqty jappaı vaktsınatsııalaý bastaldy

Almaty qalasy qoǵamdyq densaýlyq saqtaý basqarmasynyń ókili Laýra Myrzaǵalıdiń aıtýynsha, Almatyda saǵat 16:30-ǵa deıin vaktsınany 4 myńnan astam adam aldy. Vaktsınatsııa naýqany belsendi júrgizilip jatyr.

«Qazirgi ýaqytta Almatyda 56 egý kabıneti bar, olardyń 16-sy jeke menshik. Biz koronavırýsqa qarsy vaktsınatsııany alǵysy keletinderdiń barlyǵyn qarsy alamyz. Sáýir aıynda 250 egý pýnktin ashý josparda», — dedi Laýra Myrzaǵalı.

Ol Almatynyń 30-dan astam saýda ortalyqtarynda koronavırýstan ekpe saldyrýǵa bolatynyn málim etti. Vaktsınatsııa saldyrǵysy kelgen kez kelgen adam ekpe ala alady. 1 sáýir kúni qalaǵa 21 860 doza vaktsına jetkizildi.

«Qazirgi ýaqytta biz Almaty qalasynda vaktsınatsııa josparyn ázirledik, búgin ol ákimmen kelisiletin bolady. Ázirshe biz barlyq uıymdastyrý máselelerin pysyqtap jatyrmyz, vaktsınatsııalaýdyń ýaqytsha pýnktteriniń oryndaryn pysyqtap jatyrmyz, sondaı-aq osy ýchaskelerde kezekshilikti kim atqaratynyn anyqtaımyz», — dedi dáriger.

Sonymen birge, qazir qyzmet etip júrgen medıtsına qyzmetkerlerine Almatynyń medıtsınalyq kolledjderiniń túlekteri kómektesetin bolady. Sondyqtan egý pýnktterinde «mamandar jetispeýshiligi» bolady dep alańdaýǵa negiz joq.

Egý kabınetteri mektepterde, bazarlarda, sondaı-aq SOO-da ashylady. Aldyn ala tizim jasaldy.

Budan basqa, Almaty bazarlarynyń aýmaǵynda: Ójet, Aq bulaq, Kenjehan, Tastaq, Orbıta, Olja, Baısat, Túrksib jáne basqa oryndarda pýnktterdi uıymdastyrý máselesi qarastyrylýda.

Aıta keteıik, vaktsınanyń birinshi komponenti 100% ıgerildi, barlyǵy 15 750 doza paıdalanyldy. «Spýtnık-V» ekinshi komponentimen vaktsınatsııa (revaktsınatsııa) 15 sáýirge deıin jalǵasady. Almatyǵa sáýir men maýsym aralyǵynda vaktsınanyń qosymsha 750 myń dozasy jetkiziledi.

Sóz sońynda Laýra Myrzaǵalı jappaı vaktsınatsııalaý kezinde dúrligýdiń qajeti joq ekenin aıtty.