Almatyda halyqty KVI-ge qarsy egý jáne revaktsınatsııa jalǵasýda

ALMATY. QazAqparat – Almatyda turaqty epıdemıologııalyq jaǵdaıdy qamtamasyz etý maqsatynda halyqty vaktsınalaý jáne revaktsınatsııalaý jalǵasýda. Bul týraly Almaty qalasynyń sanıtarııalyq-epıdemıologııalyq baqylaý departamentinen málim etti, dep habarlaıdy QazAqparat tilshisi.

Vedomstvonyń málimetinshe, Almaty qalasynda 2021 jylǵy 1 aqpannan bastap 2022 jylǵy 26 sáýirge deıin KVI-ǵa qarsy I komponentpen – 1 178 796 adam egildi, al vaktsınatsııanyń tolyq kýrsymen 1 143 424 adam qamtyldy. Sondaı-aq, 26 sáýir kúni KVI-ǵa qarsy 365 855 adam revaktsınatsııadan ótti. Bul revaktsınatsııaǵa jatatyn adamdar sanynyń 47,8%-yn quraıdy.

Jalpy, Almatyda KVI boıynsha epıdemıologııalyq jaǵdaı turaqty jáne qala «jasyl» aımaqta tur. Degenmen, qalada ujymdyq ımmýnıtet búginde 59,8%-dy quraıdy. Bul turaqty epıdemıologııalyq jaǵdaıdy ustap turý úshin jetkiliksiz (ımmýndyq qabattyń keminde 80%-yna qol jetkizý qajet).

Qazirgi ýaqytta Almaty qalasyndaǵy barlyq qalalyq emhanalarda Qaz COVIDin/Qazvak, VeroCell, «Komırnatı» (Pfizer, AQSh) sııaqty COVID-19-ǵa qarsy vaktsınalar jetkilikti mólsherde bar. Barlyq tilek bildirýshiler turǵylyqty jeri nemese jumys, oqý orny boıynsha aýmaqtyq qalalyq emhanalarda COVID-19-ǵa qarsy vaktsınatsııa, revaktsınatsııadan ótýlerine bolady.

«Almaty qalasynyń sanıtarııalyq-epıdemıologııalyq baqylaý departamenti qaladaǵy turaqty epıdemıologııalyq jaǵdaıdy saqtaý maqsatynda turǵyndardy azamattyq jaýapkershilik tanytyp, KVI-ǵa qarsy vaktsınatsııa men revaktsınatsııany keıinge qaldyrmaýǵa shaqyrady. Tek ujymdyq ımmýnıtet bizge ádettegi ómir saltyn júrgizýge múmkindik beredi. Vaktsınatsııa - COVID-19 pandemııasymen kúresýdiń eń tıimdi ádisi! Aýrýdy emdeýden góri aldyn alý ońaı», - delinedi departamenttiń habarlamasynda.

Aıta keteıik, Qazaqstanda koronavırýske qarsy 9 481 030 adam vaktsına saldyrdy.

Sondaı-aq, ótken táýlikte 16 adamnan koronavırýs ınfektsııasy anyqtalǵanyn jazǵan bolatynbyz.