Almatyda halyqqa qyzmet kórsetý ortalyqtary jumysyn bastady
ALMATY. QazAqparat – Almaty qalasynyń bas sanıtar dárigeriniń sheshimimen búginnen bastap qaladaǵy halyqqa qyzmet kórsetý ortalyqtary ashyldy, dep habarlaıdy QazAqparat tilshisi.
«Almatylyqtar HQO-da elektrondy formatta qoljetimsiz, «qaǵaz» júzindegi qyzmetterdi ǵana ala alady. Bul shamamen 100 memlekettik qyzmet, olardy alý úshin HQO-ǵa barý qajet. Sondaı-aq, HQO-dan egov.kz portaly arqyly onlaın túrde rásimdelgen qyzmetterdiń daıyn nátıjesin alýǵa bolady. Memlekettik qyzmet kórsetýdiń jańa formatyna kóshýge baılanysty nysandar epıdemııaǵa qarsy barlyq sanıtarııalyq rejımdi qatań saqtaý, áleýmettik qashyqtyq jáne adamdar aǵynyn retteý sekildi sharalardy saqtaı otyryp jumys isteýde», - deıdi «Azamattarǵa arnalǵan úkimet» memlekettik korporatsııasy Almaty qalasy fılıalynyń dırektory Danııar Qyryqbaev.
Osylaısha, qalada 16 front-ofıs, 5– mamandandyrylǵan HQO, 2 – Mıgratsııalyq, 2– Tsıfrlyq qyzmet kórsetý ortalyqtary ashyldy. 1600-den astam qyzmetker jumysqa shyqty. Onyń ishinde klıenttermen tikeleı baılanysta jumys isteıtin 933 front-ofıs mamany bar. Jumys ýaqyty dúısenbi men senbi aralyǵynda, tańǵy saǵat 9.00-den 18.00-ge deıin. Aldyn ala jazylýsyz HQO-larda eshqandaı qyzmet kórsetilmeıdi. HQO-ǵa barý úshin kezek ýaqytyn 1414 baılanys ortalyǵy nemese nemese egov.kz portalyndaǵy arnaıy servıs arqyly aldyn ala brondaý qajet bolady.
«Qalǵan, elektrondy formatqa aýdarylǵan jáne egov.kz portalynda qoljetimdi barlyq memlekettik qyzmettiń 80%-dan astamyn tek ózdiginen nemese ákimdikter janyndaǵy keńselerde, oqý oryndarynda, medıtsınalyq uıymdarda, ekinshi deńgeıdegi bankterde, jumyspen qamtý jáne áleýmettik baǵdarlamalar bólimderinde, «Nur Otan» partııasy keńselerinde, saýda ortalyqtarynda, avtosalondarda, jáne t.b. oryndardaǵy ózine-ózi qyzmet kórsetý sektorlarynan ala alady. Bul azamattardyń HQO-da kóptep jınalýyn boldyrmaıdy jáne vırýsty juqtyrý qaýpin joıady», - deıdi fılıal dırektory Danııar Qyryqbaev.
Búgingi tańda, Almaty qalasy fılıaly úıden shyqpaı-aq memlekettik qyzmetterdi elektrondyq formatta alýǵa múmkindigi joq adamdarǵa 40-qa jýyq eGov buryshy daıyndaldy.
Zeınetkerler, kópbalaly otbasylar men múgedekter úshin ár front-ofıste jeńildik terezesi jumys isteıdi. Olar da HQO-ǵa baratyn ýaqytyn aldyn ala brondaýy kerek.
«HQO-ǵa tek maskamen kirgiziledi. Ǵımarattyń aldynda kelýshilerdiń áleýmettik qashyqtyqty saqtaý úshin arnaıy tańbalar syzylǵan. Koronavırýs ınfektsııasyn juqtyrý qaýpi áli joıylǵan joq, bul sharalardyń barlyǵy almatylyqtardyń qaýipsizdigin qamtamasyz etý úshin qabyldanǵan»,– dep qortyndylady Danııar Qyryqbaev.
