Almatyda halyqqa qyzmet kórsetý ortalyǵynda júkti áıel bosanyp qaldy
Bul týraly «Azamattarǵa arnalǵan úkimet» MK basqarýshy dırektory Murat Jumanbaı Facebook -tegi paraqshasynda jazdy.
Onyń aıtýynsha, Jetisý aýdanyndaǵy HQO ortalyǵyna júkti áıel óziniń tanysymen turǵylyqty mekenjaıy boıynsha tirkeýge otyrýǵa kelgen.
«Júkti kelinshek aldyn ala túski saǵat 12:00-ge brondap qoıǵan kezegin kútip otyrǵan. 10 mınýttan soń onyń tolǵaǵy bastalyp ketti. Ony kórgen HQO basshysynyń mindetin ýaqytsha atqarýshy Qalmyrza Seıtbekov ony birden kabınetine aparyp, jedel járdem shaqyrtty. Jedel járdem kóligi kelgenimen júkti kelinshekti perzenthanaǵa jetkizýge ýaqyt bolmady. Sóıtip, kelinshek halyqqa qyzmet kórsetý ortalyǵy basshysynyń kabınetinde bosanyp qaldy. Dúnıege qyz bala keldi. Bul otbasyndaǵy úshinshi bala eken. Quttyqtaımyz!»,– dep jazdy ol.
Aıtpaqshy, jańa bosanǵan kelinshek ózine qajetti qyzmetti alyp úlgerdi.
