Almatyda halyqaralyq jáne qazaqstandyq eńbek naryǵyndaǵy Memlekettik bilim standarty máselesi talqylanýda
ALMATY. Qarashanyń 19-y. QazAqparat /Názıra Eleýhan/ - Búgin Almatyda Ál-Farabı atyndaǵy QazUÝ-de Qazaqstannyń jetekshi JOO prorektorlarynyń qatysýymen Qazaqstan Respýblıkasynyń Bilim jáne ǵylym mınıstrliginiń Respýblıkalyq oqý-ádistemelik keńesiniń gýmanıtarlyq jáne jaratylystaný ǵylymdary sektsııasynyń kezekti májilisi ótti,
dep habarlaıdy QazAqparat.
Kezekti otyrys «Memlekettik bilim standarttarynyń jalpyǵa ortaqtyǵy: halyqaralyq jáne qazaqstandyq eńbek naryǵyna jaýap berý» taqyrybyna arnaldy. «Sapaly bilim berýdi qamtamasyz etýde eń negizgi máseleniń biri eńbek naryǵynyń qajettiligin bilmeı daıyndalyp jatqan mamandar. Ókinishke qaraı, memlekettik bilim standarty jıi ózgerýde, bir jaǵynan jaqsy bolǵanymen, ekinshi jaǵynan JOO-lar beıimdelip úlgere almaı jatyr. Olardyń jasaǵan jumystary 2-3 adamnan qurylǵan qysqa ujym aıasynda qalyp qoıady. Jańa býynnyń standarty eńbek naryǵynyń jáne bilim tutynýshylaryna qaraı qurylýy tıis» deıdi Turan ýnıversıtetiniń prorektory Ákimjan Arýpov.
Qazaqstan ekonomıkasy men adamdyq faktordyń damýy bilikti mamandardy daıyndaýda memlekettik bilim standarttarynyń jalpyǵa ortaq ustanymdarynan bastaý alady. Sondyqtan onyń damýyna úlken mán beriledi. Ol birneshe kezeńnen ótken bolatyn (1996, 2001, 2002, 20004, 2006, 2008, 2009 jj.). Qazaqstan ekonomıkasyna qoıylatyn talaptarǵa saı ózgeristerge ushyrap otyrdy. Jıyn jumysyna Ońtústik Koreıa jáne elimizdiń JOO-nyń ókilderi, professorlar men ustazdar qaýymy qatysty.
