Almatyda halyqaralyq tarıhı eskertkishterdi qorǵaý kúnine arnalǵan mádenı is-shara ótti
ALMATY. 18 sáýir. QazAqparat /Názıra Eleýhan/ - 18 sáýir - Halyqaralyq tarıhı eskertkishterdi qorǵaý kúni.
Ataýly kúnge oraı búgin halqymyzdyń uly aqyny Jambyl Jabaevtyń monýmenttik eskertkishiniń aldynda «Eskertkishter syr shertedi» atty mádenı is-shara ótti.
Atalmysh sharanyń uıymdastyrýshylary - Almaty qalasy ákimdigi, Medeý aýdanynyń kitaphanalary, Almaty qalasy tarıhynyń murajaıy.
Mádenı shara uly aqynnyń eskertkishine gúl shoǵyn qoıý rásimimen bastalyp, №161 J.Jabaev atyndaǵy qazaq lıtseıiniń, №159 Y.Altynsarın atyndaǵy gımnazııanyń jáne №17 mektep-ınternatynyń oqýshylary, sonymen qatar Respýblıkalyq Ulan sarbazdary Jambyl Jabaevtyń óleńderin oqyp, óz ónerlerin kórsetti.
Sharaǵa belgili sáýletshiler, mádenıet qaıratkerleri, «Nur Otan» partııasynyń ókilderi men qoǵam qaıratkerleri qatysty.
«Mádenıet basqarmasy jyl saıyn eskertkishterdi qorǵaý kúni qalamyzdaǵy tarıhı oryndar men eskertkishter mańynda ár túrli mádenı sharalardy uıymdastyrýdy dástúrge aınaldyrdy. Ondaǵy maqsat -jas urpaqty tarıhı qundylyqtarymyzben tanystyrý, tarıhı eskertkishterimiz - mádenı muralarymyzdy qasterlep saqtaýǵa, qurmetteýge shaqyrý, sondaı-aq, jastardy otansúıgishtikke tárbıeleý bolyp tabylady», - dedi Mádenıet basqarmasy basshysynyń orynbasary Erbolat Áýezov. Onyń aıtýynsha, aldaǵy ýaqytta Almatyda 10 eskertkish qoıylmaq. «Bıyl dara tulǵa Nurǵısa Tilendıevtiń qurmetine eskertkish qoıýdy josparlap otyrmyz. Qazir eskertkishtiń kelbetine baıqaý jarııalandy»,-dedi ol.
Shara barysynda qalamyzdyń tarıhı eskertkishteri men kórikti jerlerinen syr shertetin «Almaty sáýlet eskertkishteri» atty kórme ashyldy.
