Almatyda halyqaralyq saýdany jeńildetý týraly konferentsııa bolady
ALMATY. 20 sáýir. QazAqparat /Erlik Erjanuly/ - Almatyda 22 sáýir kúni «Halyqaralyq saýdany jeńildetý: reformalardy júrgizý jáne 2012 jylǵy josparlar» dep atalatyn konferentsııa ótedi.
Ony AQSh-tyń halyqaralyq damý jónindegi agenttiginiń Saýda men kedendik reformalardy yryqtandyrý jónindegi (RTLC) aımaqtyq jobasy uıymdastyryp otyr. Dástúrli túrde jyl saıyn bolatyn bul konferentsııa bıyl 3-ret ótpek.
Oǵan Ekonomıkalyq damý jáne saýda, Aýyl sharýashylyǵy, Densaýlyq saqtaý mınıstrlikteri, Kedendik baqylaý, Kóliktik baqylaý, Tehnıkalyq retteý, Salyq komıtetteri jáne Qazaqstannyń keden deklaranttary odaǵy, Qazaqstannyń keden brokerleri qaýymdastyǵy, Kásipkerler forýmynyń ókilderi men Halyqaralyq donorlyq jáne qarjylyq uıymdardyń qyzmetkerleri qatysady dep josparlanýda.
Bul talqylaýlar Qazaqstannyń Búkilálemdik banktiń «Bıznesti júrgizý» reıtıngindegi «Halyqaralyq saýda» kórsetkishindegi ustanymyn odan ári jaqsartýǵa arnalyp otyr.
