Almatyda halyqaralyq sarapshylar qazirgi zamanǵy qaýip-qaterdi eńserý máselelerin talqylady

ALMATY. Almatyda óńirlik SAMSA (Ortalyq Azııa - Mońǵolııa - Kavkaz - Aýǵanstan) forýmy boldy. 10 eldiń ókilderi qatysqan forýmda halyqaralyq kún tártibiniń ózekti máseleleri men óńirlik jáne jahandyq deńgeıdegi yntymaqtastyqty damytý joldary talqylandy.

QR Parlamenti Senaty baspasóz qyzmetiniń habarlaýynsha, sharany AQSh-tyń tanymal taldaý ortalyǵy – Ortalyq Azııa jáne Kavkaz ınstıtýty jáne Donald Ramsfeld atyndaǵy amerıkalyq qor uıymdastyrdy.

Forýmda QR Parlamenti Senatynyń depýtaty Asqar Shákirov negizgi baıandama jasady.

Sharaǵa qatysýshylar elimizdiń Prezıdenti Qasym-Jomart Toqaevtyń Jańa Ádiletti Qazaqstandy qurýǵa baǵyttalǵan aýqymdy saıası jańǵyrtý baǵdarlamasymen tanysty. Dúrbeleńge toly álemdegi geosaıası jaǵdaıdy eńserý aıasynda Ortalyq Azııa elderi men óńirdegi ornyqty damýdyń negizgi sebebi retinde ózara baılanysty damytýdyń mańyzdylyǵy atap ótildi.

Senator ıntermodaldyq kommýnıkatsııalar men saýda aǵyndarynyń halyqaralyq naryqtarǵa ótkizý múmkindigin edáýir keńeıte alatyn orta dálizdi (Transkaspıı kólik baǵyty), «Soltústik-Ońtústik» halyqaralyq «Bir beldeý. Bir jol» kólik dálizin damytý jónindegi elimizdiń kúsh-jigeri týraly aıtyp berdi.

Óńir aldynda turǵan jańa syn-qaterler jaǵdaıynda Ortalyq Azııa memleketteriniń kópjosparly yntymaqtastyǵyn keńeıtýdiń mańyzdylyǵy atap ótildi. Qazirgi kezdegi ózara kópjaqty is-qımyldyń áleýetine óńir elderiniń Parlamentaralyq forýmynyń jumysy Ortalyq Azııadaǵy ornyqty damýdyń strategııalyq baǵyttaryn talqylaıtyn turaqty dıalog alańy retinde járdemdesetin bolady.

Qazaqstandyq depýtat ozyq tájirıbemen almasý jáne zań shyǵarý qyzmetiniń barysyn zerdeleý maqsatynda Qazaqstan AQSh-pen strategııalyq, onyń ishinde parlamenttik baılanystar aıasyndaǵy áriptestikke erekshe mańyz beretini týraly aıtty.

Forýmǵa qatysýshylar osyndaı sıpatta Ázerbaıjan men Ózbekstanda ótkizilgen kezdesýler men pikir almasý qajettigi týraly biraýyzdan pikir bildirdi.