Almatyda Halyqaralyq sángerler baıqaýynyń «Best Dress of Kazakhstan» ulttyq kezeńiniń aqtyq syny ótti
ALMATY. 24 qańtar. QazAqparat - Qazaqstanda alǵash ret Dúnıejúzilik sulýlyq kongresiniń jáne «BRANDWORKS» kompanııasynyń qoldaýymen «Best Dress of Kazakhstan» Halyqaralyq sángerler jáne dızaınerler baıqaýynyń ulttyq kezeńiniń aqtyq syny ótti.
«Baıqaýdyń ulttyq kezeńiniń fınalyna 10 dızaıner joldama aldy. Olardyń eskızderin Dúnıejúzilik sulýlyq kongresiniń sarapshylary baǵalaǵan. Barlyǵy 28 azamat baıqaýǵa qatysýǵa nıet tanytypty. 3 jeńimpaz ústimizdegi jyly 20-24 aqpanda Rýmynııada ótetin «DRESS OF THE WORLD» halyqaralyq kezeńde el namysyn qorǵamaq», - dedi «World Beauty Congress» Qazaqstandaǵy resmı ókili jáne dırektory Elmıra Seıdazımova. Uıymdastyrýshylardyń atap ótýinshe, Tımıshoara (Rýmynııa) kýrorttyq qalasynda 40 eldiń ókilderi bas qosady. Bul baıqaý talantty adamdardy qoldap, olardyń jumystaryna ádil baǵa berýge jol ashady.
