Almatyda halyqaralyq reısterdiń sany qysqardy
ALMATY. QazAqparat - Almatyǵa keletin halyqaralyq reısterdiń sany qysqardy, dep habarlaıdy QazAqparat tilshisi.
QR Úkimeti koronavırýstyń Qazaqstan aýmaǵyna taralýyn boldyrmaý maqsatynda tıisti sharalar qabyldap jatyr. Koronavırýs ınfektsııasy anyqtalǵan elderdiń qatary kóbeıýine baılanysty 2020 jyldyń 1 naýryzynan bastap sol memleketterden keletin jolaýshylardy tekserý kúsheıtilgen. Ol 4 kezeńnen turady.
QR Indýstrııa jáne ınfraqurylymdyq damý mınıstrligi Azamattyq avıatsııa komıtetiniń málimetinshe, 2020 jyldyń 1 naýryzynan bastap Almaty – Seýl baǵyty boıynsha turaqty reısterdiń sany aptasyna 9-dan 3 reıske deıin qysqardy. «Eır Astana» áýe kompanııasynyń Almaty – Seýl baǵyty aptasyna 5-ten 1 reıske deıin jáne «Asiana Airlines» áýe kompanııasynyń reısi 2-den 1 reıske shekteldi.
Al 1 naýryzdan bastap «Mahan Air» áýe kompanııasynyń Almaty – Tegeran baǵyty boıynsha reısteri múldem toqtatyldy.
Sondaı-aq, 5 naýryzdan bastap Almaty – Baký reısi 5-ten 1 reıske deıin («Eır Astana» 3 reısten 1-ge deıin, «Azerbaijan Airlines» 2-den 1 reıske deıin) shekteledi.
Atalǵan áýe reısteriniń toqtatylýyna baılanysty 2020 jyldyń 1 naýryzynan bastap bul ushaqtarǵa bıletteri bar jolaýshylar áýe bıletterin satyp alǵan jerinen aqshasyn aıyppulsyz jáne tolyq kólemde qaıtaryp ala alady.
2020 jyldyń 3 naýryzdan bastap «Qazaqstannyń avıatsııalyq ákimshiligi» AQ bazasynda koronavırýsqa qatysty jaǵdaıdy baqylaýǵa baǵyttalǵan ahýaldyq ortalyq josparly túrde jumys isteı bastady. Bul ortalyq áýe qatynasy boıynsha Qazaqstanmen turaqty jáne turaqsyz baılanys ornatqan elderdegi ınfektsııany juqtyrǵan adamdardyń statıstıkasy baqylaıdy.
«Qazaqstannyń avıatsııalyq ákimshiligi» AQ-da jolaýshylardyń áýe bıletterin qaıtarý boıynsha týyndaǵan suraqtaryna jaýap beretin shuǵyl jeli 8 (7172) 64 58 41 iske qosyldy.
Jumys kúnderi saǵat 9.00-den keshki 18.00-ge deıin sozylmaq.
Esterińizge sala ketsek, Qazaqstan men Qytaı arasyndaǵy barlyq turaqty reıster (aptasyna 34 reıs) 2020 jyldyń 3 aqpanynan bastap toqtatyldy.
