Almatyda halyqaralyq mánge ıe «Balqash-Nursaıa» jobasy tanystyryldy
ALMATY. Jeltoqsannyń 14-i. QazAqparat /Názıra Eleýhan/ - Búgin Almatyda «Balqash-Nursaıa» halyqaralyq saýyqtyrý-týrıstik ortalyǵy» ınvestıtsııalyq jobasynyń tanystyrylymy bolyp ótti,
dep habarlaıdy QazAqparat.
«Bul joba QR Prezıdenti Nursultan Nazarbaevtyń Joldaýynda belgilengen halyqty saýyqtyrý ulttyq baǵadarlamasy aıasynda qurylyp, júzege asyrylýda. Jobany júzege asyrýǵa Almaty - Astana kúrejolynan 8 shaqyrym qashyqtyqta ornalasqan, Balqash kóliniń soltústik jaǵasyndaǵy Prıozersk qalasy aýdanynan 370 gektar jer kólemi bólindi. Qazirgi tańda jobanyń bastapqy kezeńi júzege asyryldy. Kýrort ornynda 51 kıiz úıden qalashyq ornatyldy. Ol demalýǵa, emdelýge jáne Balqash jaǵasynda balyq aýlaýǵa nıetti adamdardy qabyldaýǵa daıyn», dedi «Balqash-Nursaıa» JShS prezıdenti Beısenbek Quttybekuly. Onyń aıtýynsha, búkil keshen 100 paıyz balamaly kún jáne jel qýat kózderimen qamtamasyz etiletin bolady. Jobany júzege asyrýdyń kómegimen 2-3 myńǵa jýyq jumys orny qurylmaq.
Tanystyrylym barysynda joba quramyna iskerlik, mádenı, oıyn-saýyq jáne saýyqtyrý obektileri: shyǵys jáne eýropa medıtsınasy, sazben jáne sýmen emdeý, SPA-salondar, kontsert zaldary, kınoteatralar, túrli halyqtardyń taǵamdary usynylǵan meıramhanalar, sporttyq saýyqtyrý kesheni, golf klýby, báıge orny, safarı saıabaǵy, etnıkalyq aýyldar, ekspoortalyǵy, bıznes ortalyǵy, kottedj qalashyǵy, saq qalashyǵy, shatyrly kıiz úı lageri, balalar lageri, kólik logıstıkalyq ortalyq jáne taǵy da basqa obektiler kiretindigi atalyp ótildi. Jobanyń jalpy quny - 420 mıllıon AQSh dollaryna jýyq. Obektiniń eseptelgen ótemdilik merzimi - 6 jyl. Jobanyń júzege asyrý merzimi - 2010-2015 jyldar aralyǵy.
Jıyn barysynda Japonııanyń belgili saıası jáne qoǵam qaıratkeri, delegatsııa jetekshisi Aeba Takako Balqash kóline arnalǵan qarjy barlyq ekologııalyq normalardy esepke ala otyryp baǵyttalady, dep atap ótip, «Japonııa óz tarapynan Balqash kólinde gıdrosferany tazartatyn arnaıy baldyrlar ósirý boıynsha jobany júzege asyrý arqyly kóldiń tazalyǵyn saqtap qalýǵa óz úlesin qosýǵa daıyn», dedi. «Balqash-Nursaıa» jobasyna Japonııa kásipkerlerinen basqa Reseı, Túrkııa, Qytaı, arab elderiniń ınvestorlary qyzyǵýshylyq tanytyp otyr.
Jobany keshendi júzege asyrý úshin uıymdastyrýshylar Balkhash Lake Halyqaralyq qaýymdastyǵyn qurmaq. Atalmysh qaýymdastyqtyń maqsaty Balqash kólin saqtaý jáne ony tıimdi paıdalaný bolyp tabylady.
