Almatyda Halyqaralyq kitap kórmesi ótedi
ALMATY. QazAqparat - 29-30 mamyr aralyǵynda Almatyda «AlmatyBookExpo» halyqaralyq kitap kórme-jármeńkesi ótedi. Atalmysh kórmeni ótkizý máselesi Almatyda ótken QR Ulttyq memlekettik kitap palatasy men Qazaqstannyń baspagerler men kitap taratýshylar qaýymdastyǵy uıymdastyrǵan dóńgelek ústel barysynda talqylandy.
Kórme otandyq jáne shetel baspalary, ádebı agentter, TMD, Iran, Qytaı elderiniń kitap saýdasy uıymdarynyń basyn qosady dep kútilýde. Qonaqtar kitap álemindegi jańalyqtar, baspa bıznesiniń damýy salasyndaǵy úrdister týraly aqparat alyp, ózderin qyzyqtyrǵan kitaptardy satyp alýǵa, baspalarmen kelisimshart jasasýlaryna múmkindik týady.
Dóńgelek ústel barysynda onyń qatysýshylary Qazaqstan men Reseı kitap naryǵynyń sýbektilerimen yntymaqtastyqqa baılanysty máselelerdi keńinen talqylamaq. Otyrys aıasynda QR Kitap palatasy men Prıvoljsk Kitap palatasy arasyndaǵy aqparattyq yntymaqtastyq týraly shartqa qol qoıyldy.
Sóz sóılegender eki el kitap naryǵy sýbektileriniń birlesken jumysy edáýir nyǵaıyp, Keden odaǵy men Biryńǵaı ekonomıkalyq keńistik aıasynda arta túsetinin atap ótti. Taraptar ókilderi Qazaqstan men Reseı arasyndaǵy kitap taratý salasyndaǵy yntymaqtastyqty jaqsartý maqsatynda ótkizilgen birlesken is-sharalar týraly sóz qozǵap, keleshektegi josparlarymen oı bólisti.
