Almatyda halyqaralyq kásibı tennısshiler týrnıri bastaldy
ALMATY. QazAqparat - Almatyda kásibı tennısshiler arasynda ATP Challenger 3-shi halyqaralyq týrnıri bastaldy. Týrnırdiń júlde qory 50 myń dollar, dep habarlaıdy QazAqparat tilshisi.
Jarysqa álemniń 25 elinen 100-ge jýyq oıynshy keldi. Olar álemdik reıtıng boıynsha úzdik júzdikke engen. Qazaqstannan belgili tennısshiler - Aleksandr Nedovesov, Tımýr Habıbýllın, Roman Hasanov jáne Denıs Evseev, sondaı-aq jas oıynshylar Tımofeı Skatov pen Dostanbek Tashbýlatov ta qatysýda. Chempıonat Gorky Tennis Park alańynda ótip jatyr .
«Bul Qazaqstandaǵy Prezıdent kýbogynan keıingi mártebeli týrnır. Buǵan álemniń úzdik oıynshylary qatysyp jatyr. Saıys qatysýshylaryna júlde qorynan bólek «Ýımbldon» sııaqty álemdik týrnırge ótý úshin jınaıtyn upaı sanynyń mańyzy zor. Bizdiń tennısshiler «US Open» týrnırine qatysýdy kózdep otyr. Básekelestik óte joǵary bolǵandyqtan, oıynshylarymyzǵa ońaıǵa soqpasy anyq. Tashbýlatov pen Skatov sekildi jas sportshylar tájirıbe jınaqtaıdy. Al Habıbýllın, Nedovesov jáne Evseev sııaqty tájirıbeli tenısshiler kóp upaı jınap, reıtıngterin kóteredi. Halyqaralyq tennıs federatsııasynyń joǵary baǵasyn alyp jatqanymyzǵa qýanyshtymyz. Al jas sportshylardyń jeńiske umtylatynyna senimimiz mol», - dedi QR tennıs federatsııasynyń vıtse-prezıdenti Dıas Dosqaraev.
