Almatyda halyqaralyq ǵylymı kongress ótip jatyr
ALMATY. Jeltoqsannyń 4-i. QazAqparat /Ádilet Musahaev/ - Almaty qalasynda Halyqaralyq bıznes ýnıversıtetiniń uıymdastyrýymen «Ǵalamdanýdaǵy Qazaqstan: áleýmettik-ekonomıkalyq jáne mádenı salalary» taqyrybynda birinshi halyqaralyq ǵylymı kongress ótip jatyr,
dep habarlaıdy QazAqparat.
Keshe bastalǵan bul sharaǵa Qyrǵyzstan, Ispanııa, Ońtústik Koreıa, AQSh elderiniń ǵalymdary men mamandary jáne otandyq 15 joǵary oqý oryndarynyń ókilderi qatysýda.
Májilisti ýnıversıtet rektory, professor Gennadıı Gamarnık óziniń quttyqtaý sózimen ashty. Onyń aıtýynsha, «daryndy urpaq» tárbıeleý máselesi boıynsha biregeı usynystardy daıarlaı otyryp, stýdenttik jobalar men ǵylymı zertteýlerdiń ıntegratsııasy boıynsha joǵary oqý oryndary arasyndaǵy yntymaqtastyqty nyǵaıta túsý qajet. «Sharanyń negizgi maqsaty - ǵalamdaný kezindegi Qazaqstan qoǵamynyń ekonomıkalyq, áleýmettik jáne mádenı ózgeristeri men Qazaqstan ekonomıkasynyń ilgeri damýyndaǵy qarjy jáne aqparat tehnologııalarynyń ornyn talqylaý», deıdi rektor.
Shara barysynda «Qazaqstannyń ekonomıkasynyń ıntegratsııalyq protsester kezindegi damýynyń negizgi baǵyttary, erekshelikteri jáne zańdylyqtary», «Ǵalamdaný kezindegi til, mádenıet jáne áleýmet máseleleri», «Qazaqstan stýdentter qaýymdastyǵynyń álemdik bilim keńistigine qosylýyndaǵy halyqaralyq jobalardyń alar orny» jáne taǵy basqa taqyryptarda baıandamalar oqylyp, talqylanbaq. Sonymen qatar qazirgi zaman bilim berý jáne ǵylym salalaryndaǵy kúrdeli máselelerdi sheshý úshin pikir almasý bolady.
