Almatyda Halyqaralyq Gandbol federatsııasynyń qurlyqtyq dárejedegi aýyspaly júldesi úshin jarys ótedi
ASTANA. 31 qazan. QazAqparat - 3-6 qarasha kúnderi Almaty qalasynda 21 jasqa deıingi jas qyzdar arasynda Halyqaralyq Gandbol federatsııasynyń qurlyqtyq aýyspaly Trofeı júldesi úshin jarys ótedi, dep habarlady QR Gandbol federatsııasynyń baspasóz qyzmetinen.
Oǵan Kongo, Kýba, Fınlıandııa, Qazaqstan elderiniń komandalary qatyspaq.
Jarys aıasynda týrnırge qatysýshy delegatsııalardyń tóreshileri men jattyqtyrýshylaryna arnalǵan semınarlar uıymdastyrylady.
«Aýyspaly Trofeı» júldesi - Halyqaralyq Gandbol federatsııasynyń áıelder men erler komandasy oıynshylarynyń sheberlikterin shyńdaý úshin, sonymen qatar jattyqtyrýshylardyń, deneshynyqtyrý páni oqytýshylary men tóreshilerdiń biliktilikterin jetildirý maqsatynda halyqaralyq federatsııalarmen jáne jergilikti uıymdastyrýshylarmen birlesip ótkizetin resmı is-shara.
HGF-nyń «Aýyspaly Trofeı» jańa jobasy ótken jyldyń basynda uıymdastyrylǵan bolatyn. Jobanyń maqsaty - 2011 jyldyń sońynda «Halyqaralyq Gandbol federatsııasynyń aýyspaly Trofeıi» atty jarystyń qurlyqaralyq kezeńin ótkizý.
Atalǵan jarystyń saltanatty ashylýy 3 qarasha kúni Balýan Sholaq atyndaǵy sport saraıynda ótedi.
