Almatyda Halyqaralyq eskertkishterdi qorǵaý kúnine oraı birneshe is-sharalar ótedi
ALMATY. Sáýirdiń 16-sy. QazAqparat /Názıra Eleýhan/ - Almatyda Halyqaralyq eskertkishterdi qorǵaý kúnine oraı «Tarıhı-mádenı jáne tabıǵı eskertkishterdi saqtaýdaǵy máseleler» atty «dóńgelek ústel» otyrysy ótti,
dep habarlaıdy QazAqparat.
Bas qosýǵa qatysýshylar jańa jaǵdaıdaǵy tarıhı-mádenı jáne tabıǵı eskertkishterdi qorǵaýǵa baılanysty máselelerdi, qorǵaýdaǵy normatıvti-zań bazasyn, eskertkishterdi qaıta jóndeý, qalpyna keltirý, jańǵyrtý máselelerin talqylady.
Almaty qalasynyń tarıhı-mádenı mura jáne tabıǵı eskertkishterdi qorǵaý mádenıet basqaramasynyń bólim bastyǵy Nurlan Atyǵaevtiń aıtýynsha, atalmysh merekege oraı aldaǵy kúnderi birneshe is-sharalar ótedi. «Barlyq eskertkishter qoıylǵan oryndarda, «Boraldaı saq qorǵany» arheologııalyq parkinde senbilikter ótedi. Sonymen qatar, ádebı oqylymdar, gúl shoqtaryn qoıý rásimderi uıymdastyrylady. Sondaı-aq D.Qonaev murajaı-úıinde jáne Almaty qalasynyń tarıhı murajaıynda ashyq esik kúnderi bolady», dedi ol.
Otyrys barysynda eskertkishterdi qorǵaý salasynda birqatar máseleler bar ekendigi aıtyldy. «Bizdiń zańdyq normada qarama-qaıshylyq bar. Eskertkishterdi qorǵaý týraly zańdyq aktilerdi bir jónge keltirý kerek. Óıtkeni, arasynda bir-birine qaıshy keletin dúnıeler kóp», dep atap ótti Nurlan Atyǵaev.
A.Marǵulan atyndaǵy Arheologııalyq ınstıtýttyń dırektory Karl Baıpaqovtyń aıtýynsha, kezinde Almaty saq qorǵandaryna toly bolatyn. "Sońǵy ýaqyttaǵy úı qurylystary kóp salynǵandyqtan, baı tarıhı-mádenı muralardyń 95 paıyzyn joǵaltyp aldyq", dep atap ótti tanymal ǵalym.
«Dóńgelek ústel» otyrysyna ǵalymdar, arhıtektorlar, skýlptorlar, halyqaralyq uıymdar men aýdan ákimdiginiń ókilderi qatysty.
