Almatyda Halyqaralyq balalardy qorǵaý kúnine oraı ıgi shara ótti
ASTANA. QazAqparat - Halyqaralyq balalardy qorǵaý kúni qarsańynda «Astana Polo Club» shógen klýby «Nur» qaıyrymdylyq otbasylyq balalar úıiniń tárbıelenýshilerine arnap is-shara ótkizdi, - dep habarlaıdy QazAqparat tilshisi «Astana Polo Club» klýbynyń baspasóz qyzmetine silteme jasap.
Almaty oblysy, Talǵar aýdany, «Aqbulaq» sporttyq saýyqtyrý kesheninde balalar úshin atqa miný jáne shógen sporty boıynsha sheberlik sabaqtary, oıyn-saýyq pen tabıǵat aıasynda tamasha demalys uıymdastyryldy. Dámdi dastarhannan dám tatqan balalarǵa sporttyq kıimder jıyntyǵy men estelik syılyqtar taratyldy.
«Nur» qaıyrymdylyq otbasylyq úıi 1998 jyly qurylǵaly beri 70-ke jýyq balany tárbıeleıdi. Uıadan ushqan balalardyń ornyn jas sábıler basady. Onyń ózge balalar úıinen aıyrmashylyǵy balalar úıiniń tárbıelenýshileri januıa jylýyn sezinip ósedi. Alaıda «Nur» otbasylyq balalar úıi zeınetkerler - Ánýarbek Baısarın men Tuıaq Esqojınanyń jeke bastamalary bolǵandyqtan, demeýshilerdiń kómegin qajet etedi.
«Astana Polo Club» klýby «Samruk-Kazyna Trust» áleýmettik jobalardy damytý qorynyń qoldaýymen «Nur» qaıyrymdylyq otbasylyq balalar úıine arnap qaıyrymdylyq is-sharalar ótkizip turýdy dástúrge aınaldyrmaq», - deıdi «Astana Polo Club» atqarýshy dırektory Aıdyn Jakejanov.
Esterińizge sala ketsek, «Astana Polo Club» komandasy 2016 jyly Argentınanyń Lýhan qalasynda ótken halyqaralyq týrnırden I orynmen oralǵan bolatyn. Sondaı-aq, 2017 jyly Argentınadaǵy «Santa Catalina Summer Cup» jáne «Torneo Summer Polo Match» halyqaralyq týrnırlerinde bizdiń komandalar sheteldik shógenshilerdi basyp ozyp, I orynnan kórindi. Bıyl óz elimizde ótken «Almaty Snow Polo Cup» halyqaralyq dodada - I oryn ózimizge buıyrdy.
Aıta ketetin jaıt, bul kúnderi «Astana Polo Club» komandasy «Munich Gold Cup 2017» (Mıýnhen, Germanııa, 25-28 mamyr aralyǵy) halyqaralyq týrnırinde Qazaqstannyń namysyn qorǵap jatyr.
