Almatyda "Halyq tutynatyn taýarlardyń ınnovatsııalyq tehnologııasy, sapasy jáne qaýipsizdigi" degen taqyrypta halyqaralyq ǵylymı - tájirıbelik konferentsııa ótip jatyr
ALMATY. Maýsymnyń 17-si. QazAqparat /Názıra Eleýhan /- Almatyda tehnıka ǵylymdarynyń doktory, professor, Halyqaralyq ınjenerlik akademııanyń akademıgi, QR Ulttyq ınjenerlk akademııanyń vıtse-prezıdenti Ábdirazaq Jomartovtyń 70 jyldyq mereıtoıyna arnalǵan "Halyq tutynatyn taýarlardyń ınnovatsııalyq tehnologııasy, sapasy jáne qaýipsizdigi" degen taqyrypta halyqaralyq ǵylymı - tájirıbelik konferentsııa ótip jatyr,
dep habarlaıdy QazAqparat.
QR Ulttyq ınjenerlik akademııanyń, Almaty tehnologııalyq ýnıversıtetiniń, «Symbat» sán bıznes akademııasynyń jáne «Legprom» JShS-niń uıymdastyrýymen ótip jatqan konferentsııa jumysyna elimizdiń jáne shet elderdiń ǵalymdary men jeńil ónerkásip salasynyń tanymal mamandary qatysýda.
Konferentsııada tutynýshylardyń tutyný taýarlaryndaǵy suranystaryn qanaǵattandyrýdaǵy jeńil ónerkásip salasynyń damýy máseleleri, óndiriske jańa tehnologııalardy tartý, kásiporynnyń tehnıkalyq deńgeıin kóterý, jańa qural-jabdyqtardy qurý, dızaındy jaqsartý, halyq tutynatyn taýarlardyń sapasy men qaýipsizdigi, sonymen qatar, jeńil ónerkásip salasyna ınjenerlik jáne ǵylymı kadrlerdi daıyndaý máseleleri talqylanýda.
Sondaı-aq, jumys barysynda Qazaqstandaǵy jeńil ónerkásip salasynyń damý tujyrymdamasyn daıyndaý jáne qabyldaý máselesi qaralatyn bolady.
«Búgingi konferentsııany Ábdirazaq Jomartovtyń mereıtoıymen ushtastyryp otyrǵanymyz tegin emes, ol - mashına jasaý jáne stanok jasaý salasyn jetildirý men zertteýlerine baǵa jetpes úles qosqan, toqyma jáne jeńil ónerkásip salasynyń eń alǵashqy ǵalymdarynyń biri. Onyń kóptegen ǵylymı zertteýleri, ınjenerlik esepteý, toqyma jobalaý, tigin quraldary salasyna engizildi. Ol toqyma jáne jeńil ónerkásip salasynyń damýyna úlken eńbek sińirgen adam», dedi Almaty tehnologııalyq ýnıversıtetiniń rektory, akademık Quralbek Qulajanov.
