Almatyda halyq sanaǵy onlaın rejimde ótedi
ALMATY. QazAqparat - Qazaqstanda kelesi jyly halyq sanaǵy ótedi. Bul protses Almatyda qalaı uıymdastyrylatynyn qalalyq Statıstıka departamentiniń basshysy Baǵlan Qarǵulov óńirlik kommýnıkatsııalar qyzmetinde aıtty, dep habarlaıdy QazAqparat tilshisi.
Onyń aıtýynsha, qaladaǵy demografııalyq jaǵdaı birshama turaqty.
«2019 jyldyń qarashasynda Qazaqstanda halyq sanaǵy júredi. Bul sanaq ǵalamtor jelisin qoldaný arqyly onlaın rejimde júrgiziledi. Sonymen qatar, planshet arqyly halyq arasynda saýalnama júrgiziledi. Eki tásil boıynsha da respondentter ózi týraly ǵana emes, otbasy músheleri týraly da aqparat beretin bolady. Internet saýalnama 1-15 qarasha arasynda júrgiziledi. Resýrsqa «SANAQ» veb saıty arqyly kirýge bolady», - dedi departament basshysy.
Qalanyń shetki aýdandarynda sanaq naýqany bastalmastan 1 aı buryn planshet arqyly turǵyndardy tirkeý bastalady.
«Sonymen qatar, 1-30 qarasha aralyǵynda ıntervıýrler úılerdi eki márte aralap shyǵatyn bolady. Olar sanaq júrgizgende planshet qoldanatyn bolady. Halyqty tirkeý 31 qazan-1 qarasha kúni túngi 00:00 bastalady. 1-9 jeltoqsan aralyǵynda jınalǵan aqparatty qorytyndy tekserý júrgiziledi», - dedi Baǵlan Qarǵulov.
Statıstıka málimetine súıensek, Almatyda qazir 1 mln 839 myń adam ómir súrip jatyr. Ótken jylǵy kórsetkishpen salystyrǵanda 3,2%-ǵa artqan.
2018 jyldyń 8 aıynda Almatyda adam sany 36936 adamǵa ósken.
Ótken jylǵy kórsetkishpen salystyrǵanda halyqtyń tabıǵı ósimi 4,8%-ǵa artty.
Statıstıka departamenti basshysynyń aıtýynsha, almatylyqtardyń ortasha ómir súrý uzaqtyǵy 25 jylda 8 jylǵa artqan.
