Almatyda halyq ártisi Roza Baǵlanovanyń 90 jyldyq mereıtoıyna oraı «Aqmańdaılym» ánshiler baıqaýy ótedi
ALMATY. 1 naýryz. QazAqparat - Almatyda 2 naýryz kúni Qazaq memlekettik qyzdar pedagogıkalyq ýnıversıtetinde Keńes Odaǵynyń halyq ártisi, Halyq qaharmany Roza Baǵlanovanyń 90 jyldyq mereıtoıyna oraı joǵarǵy oqý oryndary stýdentteri arasynda «Aqmańdaılym» ánshiler baıqaýy ótedi.
Atalmysh sharanyń uıymdastyrýshylary - Almaly aýdany ákimdiginiń qoldaýymen, Roza Baǵlanova atyndaǵy «Altyn saqa» qaıyrymdylyq qory jáne Qazaq memlekettik qyzdar pedagogıkalyq ýnıversıteti.
Uıymdastyrýshylardyń aıtýynsha, baıqaý qazaq án óneriniń dara tulǵasy, Keńes Odaǵynyń halyq ártisi, Halyq qaharmany, Roza Baǵlanovanyń ǵumyr joly men jasaǵan eńbekterin keıingi urpaqqa keńinen nasıhattaý, sonymen qatar jastardyń qazaq ónerine degen súıispenshilikterin arttyrý jáne jańa tylsym ıdeıalaryn izdestirý, jastardyń adamgershilik jáne kórkemdik damýyn qalyptastyrý maqsatynda arnaıy uıymdastyrylmaq.
Baıqaýǵa qatysýshylar án saıysynda Roza Baǵlanovanyń repertýaryndaǵy ánderdi jandy daýyspen oryndaıtyn bolady. Ádil qazylar alqasy shyǵarmanyń oryndalý deńgeıimen qatar, sahnalyq kıim úlgisine de mán beretin bolady. Qazylar alqasynyń quramyna óner salasyndaǵy bilikti mamandar kirgen.
