Almatyda halyq aqyny Nurpeıis Baıǵanınniń 150 jyldyǵyna arnalǵan merekelik sharalar ótýde
ALMATY. Qazannyń 23-i. QazAqparat /Erbol Turymbetov/ - Almatyda qazaqtyń kórnekti aqyny, jyraý Nurpeıis Baıǵanınniń 150 jyldyǵyna arnalǵan merekelik sharalar bastaldy. Keshe aqyndy eske túsirýge arnalǵan kesh bolyp ótti.
Onda «ASU PICTURES» kreatıvti toby túsirgen «Nurpeıis Baıǵanın» derekti fılmi kórsetildi. Onan soń tanymal «Roksonakı» toby N. Baıǵanın sózderine jazylǵan ánderden kontsert berdi. Ondaǵy keı ánder alǵash ret oryndalyp otyr.
Sonymen qatar, sharalar aıasynda 26-shy qazan kúni M. O. Áýezov atyndaǵy murajaı-úıinde «Nurpeıis Baıǵanın jáne halyq mýzykasy» taqyrybynda dóńgelek ústel men 28-shi qazan kúni Ortalyq kórme zalynda «Qazaq eposynyń ǵajaıyp álemi» atty balalar shyǵarmashylyǵy kórmesi ótedi.
«Bul sharalardyń barlyǵy qazirgi qazaqstandyqtar úshin. Kórmede balalar, eske alý keshinde mýzykanttar, dóńgelek ústelde tanymal ǵalymdar, mádenıettanýshylar, mýzykanttar qatysady. Qazaq dalasynyń dańǵaıyr aqynyna biz osylaı qurmet kórsetemiz. Bizge túsirýge múmkindik týǵan fılm de, qazaqtyń dástúrli ánderin naqyshymen oryndaǵan «Roksonakı» de unap qaldy. Sonymen birge, balalardyń qazaq mádenıetin qalaı tanyp jatqany da tamsandyrdy. Biz osy qýanyshymyzdy bárimen bóliskimiz keledi», - dedi N. Baıǵanın atyndaǵy mádenıet qorynyń osy sharany uıymdastyrýshylary.
Bul sózderdi uly aqynnyń nemeresi ári qor jetekshisi Erbolat Baıǵanın de tolyqtyrdy. «Men atamnyń qaldyrǵan mol murasynyń elimizdiń mádenıeti úshin mańyzdy ári qundy ekenin túsindim. Sondyqtan, óz mamandyǵyma qatysy bolmasa da sol muralardyń jańa dáýirin bastaýdy jón kórdim», - dedi ol.
Nurpeıis Baıǵanın qazirgi Aqtóbe oblysy Baıǵanın aýdanynda 1860 jyly dúnıege kelgen. Aqyndyq ónerdi eń alǵash anasynan úırengen. 16-17 jasynan-aq «bala jyrshy» atanyp, Abyl, Shernııaz, Nurym, Qashaǵan, Aqtan, Qazaqbaı, Sabyr tárizdi belgili aqyndardan úlgi alady, birqatarymen aıtysqa túsedi. Ol negizinen «Qubyǵul», «Tórehan», «Qobylandy», «Er Tarǵyn», «Alpamys», «Qyz Jibek», «Aıman-Sholpan» sııaqty jyr-dastandardy jyrlaǵan. Sonymen birge, «Aqkenje», «Narqyz» sııaqty óz týyndylaryn shyǵardy. 1940 jyly «Qurmet belgisi» ordenimen marapattaldy.
