Almatyda halqymyzdyń salt-dástúri jaıynda kitap jaryq kórdi
ATY. 26 qarasha. QazAqparat /Názıra Eleýhan/ - QR Ulttyq kitaphanasynda Qazaqstan Jastar odaǵy jáne Halyqaralyq «Alash» ádebı syılyqtarynyń laýreaty, aqyn Qasymhan Begmanovtyń «Etnografpen áńgime» jáne «Salty myqtynyń - halqy myqty» atty jańa kitaptarynyń tusaýkeseri ótti.
Atalmysh kitaptar zertteýshi ǵalym Jaǵda Babalyqulymen syr-suhbattan turady jáne halqymyzdyń salt-dástúrine, ádet-ǵurpyna arnalǵan.
«Etnografpen áńgime» kitaby Respýblıkalyq «Dástúr» baspasynan 3000 danamen shyqqan. Onda kórnekti etnograf, zertteýshi ǵalym Jaǵda Babalyqulynyń ómir jolyna qatysty buryn esh jerde jarııalanbaǵan tyń derekter, abyzdyń áli kúnge deıin elge belgisiz, baspasóz betterinde shyqpaǵan eńbekteri bar. Halqymyzdyń umyt bola bastaǵan salt-dástúri, ádet-ǵurpy, kóne sózderi, turmys-tirshiligi, yrymdary men tyıymdary, joramaldary, saıatshylyq dástúri, qazaq kúntizbesi, tús jorýy, jyl qaıyrýy, jeti ata joly, qazaq ólshemderi jáne taǵy da basqa derekter jan-jaqty qamtylǵan.
Al, «Salty myqtynyń - halqy myqty» atty kitap «Ólke» baspasynan 2000 danamen memlekettik tapsyrys boıynsha basylyp shyqqan. Munda avtor osy syr-suhbatty birneshe bólimder men taraýlarǵa bólip oqyrmanǵa barynsha yqshamdap usynǵan.
"Halqymyzdyń dástúrlerin, ata-saltyn nasıhattaıtyn bul kitaptyń tili jeńil, mazmuny baı, derekteri mol. Kitapta ǵalym Jaǵda Babalyqulynyń aıtqan áńgimeleri, sózderi rýhanı baılyǵymyzǵa aınalatyny sózsiz. Óıtkeni onyń árbir sózi ultymyz úshin asa qundy derekter. Kitap bolashaq jas urpaq úshin bereri mol maǵlumattarǵa baı. Endigi maqsatymyz Jaǵda Babalyqulynyń bar qoljazbalarynan ol jaıynda kitap shyǵaryp, eńbekterin bolashaqqa jetkizýimiz kerek",-dedi «Qazaq entsıklopedııasy» AQ prezıdenti Baýyrjan Jaqyp tusaýkeser barysynda.
Kitaptardyń tusaýkeserine aqyn-jazýshylar, jýrnalıster, etnograf ǵalymdar qatysty.
