Almatyda Hackday biregeı ıdeıalar festıvali bastaldy

ALMATY. QazAqparat - Almatyda Hackday kreatıvti ıdeıalar festıvali ótip jatyr, dep habarlaıdy QazAqparat tilshisi.

Hackday - jas mamandar óz ıdeıalaryn jasampaz ári beıresmı ortada jaramdy startaptarǵa aınaldyratyn TMD-daǵy eń iri festıval.

«Qatysýshylardyń kóptigi qýantady. Biz qyzyqty ıdeıalar men jobalardy usynatyn jastardy únemi qoldaýǵa tyrysamyz. Qazir tsıfrlyq tehnologııalardyń zamany. Sondyqtan barlyǵy da óz ıdeıalaryn iske asyryp, jeńiske jetkenin qalaımyn», - deıdi Almaty ákiminiń orynbasary Almas Mádıev.

Festıvaldy «Tsıfrlyq Qazaqstan» baǵdarlamasy aıasynda Halyqaralyq aqparattyq tehnologııalar ýnıversıteti QR Bilim jáne ǵylym mınıstrligimen jáne Almaty qalasynyń ákimdigimen birlese ótkizýde.

Hackday-ǵa qatysýǵa Qazaqstannyń túkpir-túkpirinen ІT saladaǵy tájirıbeli mamandar, stýdentter, mektep oqýshylary jınaldy. Olar bir kún ishinde biregeı jobany ázirlep, ony 3 mınýttyń ishinde qazylar alqasyna túsindirip shyǵýy tıis.

Jumystar: «Kıno jáne vıdeo», «Kontent jáne medıa», «Aqparattyq tehnologııalar», «Mobıldik tehnologııalar», «Dızaın jáne anımatsııa» baǵyttary boıynsha baǵalanady. Jobalardy mobıldik qosymsha nemese vıdeorolık túrinde, ne bolmasa jańa tehnologııalardyń ázirlemesi túrinde usynýǵa bolady.

Bıylǵy festıvalda jas erekshelikteri boıynsha shekteý joq. Atap aıtqanda, eń jasy úlken qatysýshy alpystan asqan bolsa, eń kishi jasampaz - 11 jasta. Ámına Batýeva 13 jasar aǵasymen birge belgisiz álemdegi kishkentaı qyz týraly shaǵyn fılm túsirmek.

«Biz «Qarakóz» atty qazaqstandyq fılmnen shabyttanyp, soǵan uqsas dúnıe jasaǵymyz keldi. Basty rólde men bolamyn. Keıipkerim belgisiz aýrýmen aýyrady, oǵan ne bolǵanyn ǵalymdar zerttep bile almaıdy. Sosyn, onyń aıaǵyn parallel álemnen kelgen áldebir jándik shaǵyp alady. Bul ári mıstıkalyq, ári fentezı bolady. Qazylar alqasy fılmge laıyqty baǵasyn beredi dep úmittenemiz», - deıdi 11 jastaǵy Ámına.

Aıta keteıik, HackDay formatyn óz qyzmetkerleriniń shyǵarmashylyq ıdeıalaryn iske asyrý úshin 2005 jyly Yahoo! kompanııasy oılap tapqan bolatyn. Festıval Qazaqstanda 2011 jyldan beri ótip keledi. Jyl saıyn oǵan 3 myńnan astam jas daryn qatysady.