Almatyda «Ǵylymnyń damýy - elimizdiń bolashaǵy» atty forým ótedi
ALMATY. 26 mamyr. QazAqparat /Ádilet Musahaev/ - Erteń Almatyda «Ǵylym ordasynda» QR Bilim jáne ǵylym mınıstri Baqytjan Jumaǵulovtyń qatysýymen «Ǵylymnyń damýy - elimizdiń bolashaǵy» atty forým óz jumysyn bastaıdy.
El Prezıdenti N.Á. Nazarbaev Qazaqstan ǵalymdarynyń aldyna eldiń ındýstrııalyq-ınnovatsııalyq damýyna jol ashý mindetin qoıyp otyrǵany belgili. Qazirgi kezde Elbasy qoldaýynyń arqasynda Qazaqstan ǵalymdarynyń osy mindetti atqarýǵa tolyq múmkindigi bar. Taıaýda "Ǵylym týraly" jańa zań qabyldandy, elimizdiń zańdaryna ózgerister engizilýde, otandyq ǵylymdy basqarýdyń jańa úlgisi jasaldy.
Zamanaýı ǵylymdy damytýdyń ózekti máselelerin keńinen talqylaýǵa Qazaqstan Parlamentiniń depýtattary, Ulttyq ǵylymı keńestiń músheleri, respýblıkanyń ǵylymı uıymdary men joǵary oqý oryndarynyń ókilderi, taıaý shet elderdiń ulttyq akademııalarynyń ókilderi, BAQ ókilderi shaqyrylǵan.
Forýmǵa qatysýshylar QR Bilim jáne ǵylym mınıstrligine qarasty uıymdardyń kórmesin tamashalaıdy. Kórme ekspozıtsııalary Qazaqstandaǵy ǵylymı-zertteý qyzmetiniń qazirgi jaı-kúıin jáne onyń keleshegin kórneki túrde beıneleıdi.
Sondaı-aq sharaǵa elimizdiń 200-den astam akademıgi qatysady dep kútilýde.
