Almatyda ǵylymı-pedagogıkalyq kadrlardy attestattaý júıesin jetildirý jóninde aımaqtyq keńes ótti
ALMATY. Aqpannyń 5-i. QazAqparat /Ádilet Musahaev/ - Búgin Almatydaǵy QazUAÝ-de QR Bilim jáne ǵylym mınıstrliginiń bilim jáne ǵylym salasyndaǵy qadaǵalaý komıteti Qazaqstan Respýblıkasynda joǵary bilikti ǵylymı jáne ǵylymı-pedagogıkalyq kadrlardy attestattaý júıesin jetildirý jónindegi máseleler boıynsha aımaqtyq keńes ótkizdi,
dep habarlaıdy QazAqparat.
2008-2009 jyldary dıssertatsııalyq keńester júıesine ońtaılandyrý júrgizý barysynda iri aımaqtyq doktorlyq keńester biriktirilip, qurylǵan.
Qazaqstanda basqa memleketter sııaqty ǵylym doktory men kandıdattarynyń ǵylymı dárejesin berý, kadrlardy daıarlaýdyń dástúrli klassıkalyq júıesi qyzmet etip keledi. Sońǵy oqytý kezeńinde PhD fılosofııa doktorynyń dárejesi beriletin bolǵan.
Alqaly jıynda QR BǴM-niń bilim jáne ǵylym salasyndaǵy qadaǵalaý jónindegi komıtetiniń tóraǵasy Naıman Qalabaev baıandama jasap, 2009 jylǵy ǵylymı-pedogogıkalyq kadrlardy attestattaý júıesi jumysynyń qorytyndysyna, keńester qyzmetiniń kemshilikterine, dıssertatsııalardyń saraptaý sapasynyń tómendigine, PhD baǵdarlamasy qyzmetiniń alǵashqy nátıjeleri men basqa da máselelerge toqtaldy.
«Keıbir adamdar ǵylymı jumystaryn qazaqsha jazyp keledi, biraq ta ózi qazaqsha eki sózdiń basyn quraı almaıdy, nemese oryssha jóndi bilmeıdi, degenimen oryssha jazyp keledi. Tipten ne jaıynda jazǵandaryn ózderi de túsine bermeıdi», deıdi N. Qalabaev.
Keńeske Qazaqstandaǵy 150 dıssertatsııalyq keńestiń ǵalym hatshylary, joǵary oqý oryndarynyń ǵylymı jumys jónindegi prorektorlary jáne saraptaý keńesiniń ókilderi qatysty.
