Almatyda ǵylym men bilim berýdi yqpaldastyrý jobasynyń alǵashqy 84 túlegine magıstrlik dıplomdar berildi (FOTO)
ALMATY. QazAqparat - Búgin Almatyda «Ǵylym ordasy» RMK kesheninde ǵylym men bilimniń ıntegratsııasy aıasynda QR BǴM Ǵylym komıtetiniń 10 ǵylymı-zertteý ınstıtýttary men ál-Farabı atyndaǵy Qazaq ulttyq ýnıversıtetiniń birlesken magıstratýra jáne PhD doktorantýra boıynsha bilim berý baǵdarlamasynyń alǵashqy 84 túlegine magıstrlik dıplomdar tabystaý rásimi bolyp ótti.
Sharaǵa QR Bilim jáne ǵylym vıtse-mınıstri Bıbigúl Asylova qatysyp, túlekterdi quttyqtady.
«Bul jetistik otandyq ǵylymdy damytýdaǵy alǵashqy qadam. Elbasy N. Nazarbaev ǵylymı jobalardyń áleýetin kóterýge qashanda erekshe kóńil bólip keledi. Endi, jańa ýaqyt, jańa zaman aldymyzǵa jańa talaptar qoıady. Sondyqtan, biz osy jetken jetistigimizben toqtalyp qalmaı, aldaǵy ýaqytta álemdik naryqtyń qajetttilikterine der kezinde den qoıa bilýimiz kerek. Sizderdi oqýdy bitirgenderińizben quttyqtaımyn. Osy eki jyl ishinde alǵan bilimderińiz bolashaqta qyzmetterińizde kádege asady degen úmittemin. Professorlyq-oqytýshy quramǵa tabystar tileımin», - dedi B. Asylova.
Saltanatty sharaǵa QR UǴA akademıkteri, QazUÝ rektoraty men fakýltetteriniń basshylary, QR BǴM ǴK ǴZI dırektorlary, ǴZI-dyń jetekshi ǵalymdary - professorlyq-oqytýshylyq quramy, ınstıtýttardyń bilim berý baǵdarlamalarynyń magıstranttary men doktoranttary jáne basqa da múddeli tulǵalar qatysty.
2014 jyly QR Bilim jáne ǵylym mınıstrliginiń bastamasymen qolǵa alynǵan, QR BǴM ǴK ǵylymı-zertteý ınstıtýttary men ál-Farabı atyndaǵy QazUÝ birlesken bilim berý baǵdarlamalary jobasy - otandyq ǵylym men qazaqstandyq joǵary mekteptiń ınnovatsııalyq jetistikterin is júzinde yqpaldastyrýdy iske asyrýdyń sátti formalarynyń biri.
Mamandardyń aıtýynsha, ǵylym men bilim berýdi yqpaldastyrý jobasy - ǵylymı kadrlardyń jańa urpaǵyn daıyndaýǵa septigin tıgizedi.
