Almatyda grepplıngten Azııa jáne Okeanııa chempıonaty aıaqtaldy
ALMATY. QazAqparat - Almatyda grepplıngten Arlan Grip Selection halyqaralyq týrnıri aıasynda áýesqoılar men tájirıbeli sportshylar arasynda ótken Azııa jáne Okeanııa chempıonaty óz máresine jetti, dep habarlaıdy QazAqparat.
Almaty aqparat ortalyǵynyń málimetinshe, álemdik jarystyń alǵashqy kúninde Qazaqstan, Avstralııa, Malaızııa, Japonııa, Qyrǵyzstannan kelgen 50-den astam tájirıbeli grepplerler ADCC erejelerine saı kúsh synasqan.
Al búgin, chempıonattyń ekinshi kúninde Qazaqstan, Tájikstan, Qyrǵyzstan, Ózbekstan, Iran elderinen kelgen 120-dan astam áýesqoı greppler AIGA lıgasynyń tártibi boıynsha 7 salmaq dárejesinde kúsh synasty.
«Jarys óte joǵary deńgeıde ótti. Júldeli bolǵanyma qýanyshtymyn. Qarsylastarym da osal bolǵan joq. Jalpy, 2018 jyl men úshin óte sátti ótti. Kelesi jyly da odan da jaqsy jetistikter bolady dep senemin», - deıdi jeńimpazdardyń biri Shyńǵys Qasymov.
Barlyq jeńimpazdar men júldegerler arnaıy Arlan Grip medalimen jáne dıplomdarmen marapattaldy. Sondaı-aq, 300, 200, 100 dollar aqshalaı syılyqtarǵa ıe boldy.
Aıta ketý kerek, Azııa jáne Okeanııa chempıonaty Almatyda osymen ekinshi ret ótti. Alǵashqy jarys 2016 jyly uıymdastyrylǵan.
