Almatyda grek-rım kúresinen eresekter arasynda Qazaqstan chempıonaty bastaldy
ALMATY. Sáýirdiń 10-y. QazAqparat /Erlik Erjanuly/ - Búgin Almatydaǵy Dostyq sport kesheninde grek-rım kúresinen eresekter arasynda Qazaqstan chempıonaty ótip jatyr,
dep habarlaıdy QazAqparat.
Oǵan Qazaqstannyń 14 oblysy men respýblıkalyq mańyzy bar Astana, Almaty qalalarynan jeke komandalar qatysyp jatyr. Elimizdiń túkpir-túkpirinen jınalǵan 160 balýan jeti salmaq dárejesi boıynsha endi eki kún boıy ózara kúsh synasyp, jeńimpazdardan ulttyq qurama jasaqtalatyn bolady. Olarǵa halyqaralyq dárejedegi tóreshi Erik Jumabekov bastaǵan qazylar alqasy qazylyq jasaýda. Bas bapker Murathan Qasymhanovtyń aıtýynsha, ulttyq quramanyń aldynda turǵan qazirgi basty mindet Úndistandaǵy Azııa chempıonatynda, Qytaıdaǵy Azııa oıyndarynda jáne Reseıdegi Álem chempıonatynda sátti óner kórsetý bolyp otyr.
