Almatyda Gonkong pen Dýbaıdaǵy sekildi tórelik sot ortalyǵy qurylýy tıis - Elbasy
ASTANA. QazAqparat - Almatyda Gonkong pen Dýbaıdaǵy sekildi tórelik (arbıtrajdy) sot ortalyǵy qurylýy tıis. Búgin Aqordada qaıta jasaqtalǵan Úkimettiń alǵashqy keńeıtilgen otyrysynda QR Prezıdenti Nursultan Nazarbaev osylaı málimdedi.
«Tórelik sot ortalyǵyn basqarýdy Úkimet iriktegen arnaıy mamandandyrylǵan uıym júzege asyratyn bolady. Budan bólek, QR Joǵarǵy soty janynan halyqaralyq keńes qurylýy kerek. Sotqa deıingi isterdi halyqaralyq standarttarǵa saı qaraıtyn bul keńeske bedeldi sheteldik sýdıalar men zańgerler tartylýy tıis. Sonymen qatar, keńes Joǵarǵy sotqa qazaqstandyq ádilsot júıesin jetildirý boıynsha konsýltatsııalar beredi», - dedi N. Nazarbaev.
Budan bólek, Elbasy azamattyq-quqyqtyq daýlar boıynsha sottarda prokýrorlardyń qatysýyn azaıtý máselesin de kóterdi.
