Almatyda Gollıvýd keıipkerlerine «jan bitti»
ALMATY. QazAqparat - Almatyda ashyq aspan astynda Orkestrler festıvali ótti, dep habarlaıdy QazAqparat tilshisi.
Ádettegiden tys orkestr áýenin tyńdaý úshin kórermender kontsertke kelmeı, kerisinshe ónerpazdar adamdardyń ortasyna ózderi shyqty.
Festıvaldiń alǵashqy kúnin Muqan Tólebaev atyndaǵy halyq aspaptary orkestri men «Sazgen sazy» ansambli ashty.
Mýzykanttar Qurmanǵazy, Jaıaý Musa, Nurǵısa Tilendıev, Yqylas, Kenjebek Kúmisbekov, Eskendir Hasanǵalıevtyń shyǵarmashylyǵynan kompozıtsııa oryndady.
Halyq aspaptary orkestri ulttyq týyndylardan bólek álemdik klassıka shedevrlerin quıqyljytty.
Almaty aspanynda «Sevılskıı Tsırıýlnık» operasynan Rossını áýeni, Sharl Demon, Mıshel Voker kompozıtsııalary, ataqty Astor Pıatstsollanyń tangolary áýeledi.
Festıvaldiń ekinshi kúninde sahnada Gollıvýd keıipkerlerine «jan bitti».
Almaty ákiminiń sımfonııalyq-estardalyq orkestri Aleksandr Belıakovtiń jetekshiligimen jáne Qanat Ahmetov basqarǵan Memlekettik úrlemeli aspaptar orkestri Gollıvýd fılmderi men mýltfılmderindegi saýndtrekterdi oryndady.
Al sahnada «Zvezdnye Voıny», «Tıtanık», «Taksı», «Karıb teńiziniń qaraqshylary», «Madagaskar», «Rozovaıa Pantera», «Chıkago», «Kabare» týyndylarynyń keıipkerleri somdaldy.
Abaı atyndaǵy Memlekettik akademııalyq opera jáne balet teatrynyń ártisteri men Almatydaǵy semserlesý mektebiniń tárbıelenshýileri óner kórsetti.
Dırıjerdiń aıtýynsha, QR Memlekettik úrlemeli aspaptar orkestri 20 jyldan beri osyndaı tyń ıdeıalarǵa toly kontsert berip keledi.
«90-jyldardan bastap bizdiń orkestr Jańa jylǵa, 8 naýryzǵa arnap kontsert berip júr. Baǵdarlamany barynsha qyzyqty etýge tyrysamyz. Osyndaı kontsertterimizge bılet 1-2 aı buryn satylyp ketedi. Bizdiń ádettegi kontsertimizge kelýshilerimiz de kóbeıdi»,- dedi orkestrdiń bas dırıjeri Qanat Ahmetov.
Ashyq aspan astyndaǵy mýzykalyq keshter almtylyqtardyń kóńilinen shyqty.
