Almatyda gıdrometeorologııa mamandaryn daıyndaý máselesine arnalǵan dóńgelek ústel jıyny ótýde
ALMATY. 2 maýsym. QazAqparat /Erlik Erjanuly/ - Búgin Almatyda «Gıdrometeorologııa mamandaryn zamanǵa saı daıyndaý baǵyttary» dep atalatyn dóńgelek ústel jıyny ótip jatyr. Ony Ál-Farabı atyndaǵy Qazaq ulttyq ýnıversıtetiniń Geografııa fakýlteti uıymdastyryp otyr.
Bul sharaǵa «Kazgıdromet» RMK ókilderi, meteorologııa jáne qurlyq gıdrologııasy kafedralarynyń oqytýshylary jáne magıstranttar qatysýda. Qazirgi tańda QazUÝ Qazaqstandaǵy meteorologtar men gıdrologtardy daıyndaıtyn jalǵyz joǵarǵy oqý orny bolyp otyr. Ondaǵy bitirýshi mamandarǵa tapsyrys berýshi negizinen QR Qorshaǵan ortany qorǵaý mınıstrligine qarasty «Kazgıdromet» kásiporyny bolyp tabylady. Sonymen qatar meteorologtar men gıdrologtar «Qazaeroservıs» AQ-y, QazEKǴZI, kosmostyq zertteý ınstıtýty jáne taǵy basqa da mekemelerge qyzmetke tura alady.
«Bul dóńgelek ústeldiń basty maqsaty - meteorologııa jáne gıdrologııa salasynyń joǵarǵy bilikti mamandaryn daıyndaýdyń keleshegin aıqyndaý. Jumys berýshilerdiń usynystaryn eskere otyryp, meteorolog-gıdrolog mamandardy daıyndaýdyń sapasyn arttyrýǵa arnalǵan bul shara oqytýshylarǵa tapsyrys berýshiniń qazirgi kezdegi alǵa qoıǵan maqsattary men mindetterin durys túsinýge kómegin tıgizedi. Jalpy mundaı kezdesýler qarym-qatynastardy odan ary tereńdetýge jáne ǵylymı baǵyttardaǵy jumystarǵa túzetý engizýge múmkindik beredi», - deıdi Geografııa fakýltetiniń dekany Vıtalııa Salnıkov.
