Almatyda geografııa ǵylymynyń máseleleri talqylanýda
ALMATY. Sáýirdiń 28-i. QazAqparat /Názıra Eleýhan/ - Búgingi kúni geografııa ǵylymy aldyndaǵy eń basty mindet - sharýashylyqtyń, halyqtyń, tabıǵattyń ereksheligine qaraı, aımaqtyq deńgeıde jahandyq máselelerdiń jolyn tabý bolyp otyr.
Bul týraly búgin Almatyda «Qazaqstan Respýblıkasyndaǵy qazirgi zamandaǵy tendentsııa jáne geografııalyq ǵylymnyń damýy» atty halyqaralyq ǵylymı-tájirıbelik konferentsııa barysynda geografııa ǵylymynyń doktory, professor Sháripjan Nadyrov málim etti, dep habarlaıdy QazAqparat.
«Geografııa ǵylymyna tán jınaqtylyq keń aýqymdy geografııalyq negizde protsessterdi jáne geografııalyq qubylystardyń ýaqyt keńistigindegi zańdylyqtardy zertteýge múmkindik beredi. Ókinishke oraı, Keńes Úkimetiniń ydyraýy kezinde geografııanyń róli ádiletsiz jáne negizsiz tómendetildi. Geografııa ǵylymynyń potentsıaly qajetsiz bolyp qaldy, al geografııalyq bilim - qatty qysymǵa ushyrady. Degenmen, geografııalyq zertteýler men geografııalyq bilimniń mańyzdylyǵy búkil álemde kúnnen kúnge artyp keledi. Geografııa sońǵy kezde qatty aıtylyp júrgen búgingi zamanǵy tehnogendi, ekologııalyq, áleýmettik - ekonomıkalyq jáne saıası sıpattaǵy máselelermen tikeleı baılanysty», dedi geografııa ǵylymynyń doktory, professor Sháripjan Nadyrov.
Konferentsııa jumysyna Reseıdiń, Germanııanyń, Ulybrıtanııanyń jáne óz elimizdiń ǵalymdary qatysýda. OlarTáýelsizdik alǵannan keıingi Qazaqstannyń geografııa ǵylymynyń búgini men erteńin talqylap, ádistemelik jáne teorııalyq máselelerdi qaraýda.
Konferentsııa alty sektsııa boıynsha jumys isteýde. Fızıkalyq geografııa jáne geoekologııa sektsııasynda geoekologııanyń qazirgi máseleleri, ratsıonaldy qorshaǵan ortany qoldaný jáne qorshaǵan ortanyń ekologııalyq jaǵdaıy qarastyrylyp jatsa, Gıdrologııa jáne meteorologııa sektsııasynda búgingi tańda nazar aýdaryp otyrǵan másele - Qazaqstan aýmaǵynyń gıdroekologııalyq qaýipsizdigi jáne aýanyń lastanýy talqylanýda. Al, Geomorfologııa jáne kartografııa sektsııasynda Qazaqstan Respýblıkasyndaǵy ekzogendik jáne endogendik júıeler qarastyrylýda. Al, Rekreatsııa jáne týrızm sektsııasynda týrızm geografııasynyń ózekti máseleleri, rekreatsııalyq júıelerdiń qazirgi jaǵdaıy men damý bolashaǵy, erekshe qorǵalatyn tabıǵı aýmaqtardyń týrıstik áleýeti, týrıstik ınfraqurylym damýynyń qazirgi deńgeıi, sonymen qatar Qazaqstan aýmaqtaryndaǵy mamandar daıyndaý máseleleri sóz bolýda. Bul sektsııada sondaı-aq, tehnıka jáne tehnologııanyń damýyna baılanysty geografııany Jerdi qashyqtyqtan zerdeleý (DQJ) jáne GAJ (geografııalyq aqparattar júıesi) tehnologııalardy paıdalaný tásilderi talqylanýda.
Konferentsııa barysynda «Qazaqstannyń fızıkalyq geografııasy» atty oqý quralynyń tusaýkeser rásimi ótti. Oqý quraly bıologııa ǵylymdarynyń doktory, professor Aleksandr Naýmenkonyń redaktsııalaýymen, atalmysh ýnıversıtettiń baspasynan 500 danamen jaryq kórdi. Onda Qazaqstan tabıǵatynyń qalyptasýy men búgingi jaǵdaıy jáne zańdylyqtary saraptalynǵan. Kitapqa sońǵy on jyldaǵy jańa materıaldar engizilgen. Oqý qural geografııa mamandyǵy boıynsha bilim alatyn stýdentterge arnalǵan.
