Almatyda gendik aýrýlardy emdeıtin úzdik aǵylshyn dárigerleri semınar ótkizýde
ASTANA. QazAqparat - Búgin Almatyda Ulybrıtanııanyń gendik aýrýlardy emdeý boıynsha tájirıbeli mamandary aımaqtardan kelgen 100-den astam dárigerge semınar ótkizýde. Shara «Balalardaǵy mýkovıstsıdozdy dıagnostıkalaý men emdeýdiń ózekti máseleleri» atty ǵylymı-tájirıbelik konferentsııa aıasynda uıymdastyrylǵan, dep habarlaıdy QazAqparat tilshisi.
QR DSM Pedıatrııa jáne balalar hırýrgııasy ǵylymı ortalyǵy baspasóz qyzmeti keltirgen derek boıynsha, búginde Qazaqstanda resmı túrde mýkovıstsıdozǵa shaldyqqan 105 naýqas tirkelgen.
«Ár bala sapaly em alyp, uzaq ómir súrýge quqyly. Sharany ótkizýdegi basty maqsatymyz QR dárigerleriniń biliktiligin arttyryp, osy dertke medıtsınalyq qoǵamdastyqtyń nazaryn aýdartý», - deıdi «Mýkovıstsıdozben aýyratyn múgedek balalar» QB basshysy Indıra Іzbasarova.
Onyń aıtýynsha, gendik aýrýǵa shaldyqqan naýqastardy emdeý búkil álemde erekshe qymbat jáne álemniń barlyq damyǵan elderinde arnaıy Memlekettik baǵdarlamalarmen qamtamasyz etiledi.
Eki kúndik semınardy júrgizýge Greıt Ormond-strıt jáne Brompton Koroldyq aýrýhanalarynyń jetekshi dárigerleri Ien Balfýr-Lın, Ammanı Prasad, Sıýzan Medj, Mılan Matsek, Sıýzı Kennı jáne Dúnıejúzilik mýkovıstsıdoz uıymynyń Prezıdenti Terrı Stıýart myrzanyń ózi keldi. Shetel mamandary naýqas balalardy durys kútý men tamaqtandyrý boıynsha keńester beredi.
Biliktilikti arttyrý maqsatynda ótip jatqan semınarǵa pedıatrııalyq qyzmettiń 100-den astam dárigerleri: pýlmonologtar, dıetologtar, gastroenterologtar, sonymen qatar, Qazaqstan respýblıkasynyń barlyq aımaqtarynan sırek (orfandyq) aýrýlar boıynsha óńirlik úılestirýshiler men medıtsınalyq JOO stýdentteri qatysýda.
Aıta keteıik, atalmysh shara aıasynda 26 sáýir kúni sheteldik qonaqtar QR DSM Pedıatrııa jáne balalar hırýrgııasy ǵylymı ortalyǵynyń tynys-tirshiligimen tanysyp, sırek aýrýlarǵa shaldyqqan balalardyń ata-analarymen kezdesedi. Kezdesý aıasynda №2 qalalyq balalar emhanasy, QR Densaýlyq saqtaý mınıstrligi ókilderi jáne klınıka dárigerleriniń qatysýymen dóńgelek ústel otyrysy ótedi. Onda balalardaǵy mýkovıstsıdozdy dıagnostıkalaý men emdeý, aýrýdy dıagnostıkalaýdyń medıtsınalyq-genetıkalyq máseleleri, emdeý jáne dárilik zattarmen qamtamasyz etý, kınezıterapııa jáne naýqasty ońaltý máseleleri talqylanyp, oqytý dárisi boıynsha qorytyndy shyǵarylady.
Sondaı-aq, Qazaqstanda mýkovıstsıdoz ortalyǵyn salý jaıyn talqylaý josparlanǵan.
Joldas Órisbaev
