Almatyda gazǵa ýlanyp ólmek bolǵan er adam qutqaryldy
ALMATY. QazAqparat- Almatyda ishimdik iship alǵan er adam gazben ýlanyp, óz-ózine qol salmaq boldy, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, tótenshe jaǵdaı Medeý aýdanynda boldy. Polıtsııanyń kezekshi pýltine Ýálıhanov kóshesinde ornalasqan úılerdiń biriniń kireberisinde tútin shyqqany týraly aqparat kelip túsken.
«Eń aldymen, patrýldik polıtsııa jasaǵy men kelgen ýchaskelik ınspektor úı turǵyndaryn shuǵyl evakýatsııalaýǵa kiristi. Páterlerdiń biriniń balkonynda qolynda pyshaq ustaǵan er adam óz-ózimdi óltiremin dep aıǵaılaǵan. Abyroı bolǵanda, patrýl men ýchaskelik polıtsııa qyzmetkeri er adamdy qutqaryp qaldy. Ózin óltirýge jol bermedi. Keıin belgili bolǵanyndaı, ishimdik iship alǵan almatylyq ózin ýlap óltirý úshin gazdy ashyp tastaǵan. Ýaqytyly berilgen dabyl men qabyldanǵan sharalardyń arqasynda qaıǵyly jaǵdaıǵa jol berilgen joq», – dedi Medeý aýdandyq polıtsııa basqarmasynyń bastyǵy Dáýren Ótebaev.
Qazirgi ýaqytta tergeý júrip jatyr.
«Belgili bolǵandaı, er adam bul páterdi bir táýlikke jalǵa alǵan. Oılastyrylǵan jospardy iske asyrý úshin ádeıi alǵan bolýy múmkin»,- deıdi polıtsııa ókili.
