Almatyda gazben júretin «Mercedes-Benz» avtobýsy jolaýshy tasymaldaıtyn bolady
ALMATY. QazAqparat - Almaty kóshelerinde gazben júretin «Mercedes-Benz» avtobýsy jolaýshy tasymaldaıtyn bolady. Gazben júretin avtobýs úsh aı boıyna «Almatyelektrotrans» JShS qyzmet kórsetetin №12 baǵytta jáne «Green Bus Company» JShS-tiń bir baǵytynda júretin bolady, dep habarlaıdy QazAqparat tilshisi.
Nemistiń «Daimler AG» kontserni Almaty tasymaldaýshylaryna gazben júretin avtobýsty kólik baǵyttarynda testen ótkizýdi usyndy.
Jumys sapary barysynda megapolıs ákimi Baýyrjan Baıbek «Evro-6» ekologııalyq synypqa jatatyn «Mercedes-Benz» markaly avtobýstardy kórdi.
«Daimler AG» kotserni gaz qozǵaltqyshtaryn jasaıtyn álemdegi jalǵyz kompanııa bolyp tabylady, al qalǵan óndirýshilerdiń barlyǵy dızeldi dvıgatelderde gaz qondyrǵylaryn paıdalanady.
Uzyndyǵy 12 metrlik tómen edendi, kondıtsıonermen, pandýspen, ınfraqyzyl sáýlelerdi ótkizbeıtin áınekpen jabdyqtalǵan avtobýs 100-den astam jolaýshy tasymaldaı alady.
«Táýelsizdik jyldary qalada 20 avtopark jumys istegenimen, bul salany damytýǵa qarjy bólinbedi. Onyń basym bóligi kóleńkeli sektorda boldy, biraq qazirgi kezde kemshilikter joıylyp, jaýapkershilikterin jete túsinetin kompanııalardyń damýyna múmkindikter jasalyp jatyr. «Mercedes-Benz» markaly kólikter sapaly ári baǵasy da joǵary, qalalyqtar tıisti servıs bolsa qoǵamdyq kólikti paıdalanýǵa nıetti. Sondyqtan ekonomıkalyq turǵydan alǵanda kompanııanyń bolashaǵy bar», - dedi Baýyrjan Baıbek.
Qazaqstandaǵy «Daimler AG» kontserni resmı dıstrıbıýteriniń ókili Andreı Kýnah Almatydaǵy jolaýshylar tasymalyna nemis óndirýshileriniń qyzyǵýshylyq tanytyp otyrǵanyn jetkizdi.
«Kompanııa qalada oń ózgerister jasap jatyr. Naryq barynsha ashyq bola bastady ári qala ákimdigi tarapynan qoldaý kórsetilip jatyr. «Mercedes» avtobýsyn testten ótkizý bolashaqta yntymaqtastyq ornatýǵa bastama bolady dep oılaımyn», - dedi Andreı Kýnah.
"Mersedes avtobýstary kóptegen elderde jaqsy nətıje kórsetti. Ózgelerge qaraǵanda osy kólikti shyǵarýshylarǵa uzaq kepildik beriledi ári bulardyń servıstik qyzmeti de jaqsy. Qazirgi kezde biz Almaty jaǵdaıynda avtobýstardy testileýden ótkizip, onyń qorytyndysy boıynsha naqtyly sheshim shyǵaramyz. Jyljymaly sostavty jańartqan tasymaldaýshylarǵa ákimdik tarapynan sýbsıdııa tólenetinin, al gazben júretin kólik sýbsıdııasy somasynyń joǵary bolatynyn eskersek, onda «Mersedes» markaly avtobýstarmen óz avtoparkimizdi jańartý tıimdi bolar edi», - dedi «Green Bus Company» JShS dırektory Baýyrjan Kýlıshev.
Aıta ketý kerek, Almatyda №12, 22, 50, 56, 65, 69, 70, 86, 95, 103, 112, 115, 124, 126, 127, 131, 137 baǵyttary boıynsha jańa avtobýstar jolǵa shyǵyp, №77 baǵyt qaıta jańaryp, №1 baǵyt pen №201 magıstraldy baǵyty ashylǵan edi. Kórshi oblystan qalaǵa qosylǵan eldi mekenderdi kólikpen tolyq qamtý úshin 10 baǵyt ashylǵan bolatyn.
