Almatyda gazben júretin avtobýstardy testileý bastaldy
ALMATY. QazAqparat - Almaty kóshelerinde «Iveco» markaly gazben júretin jańa avtobýstar testileýden ótedi, dep habarlaıdy QazAqparat tilshisi.
Qalalyq ákimdiktiń baspasóz qyzmetiniń habarlaýynsha, kondıtsıonermen, pandýspen, beınekameralarmen qamtylǵan uzyndyǵy 12 metrlik atvobýstar bir mezette 100 jolaýshy tasymaldaı alady.
Qalalyq jolaýshylar kóligi jáne avtomobıl joldary basqarmasynyń basshysy Maqsut Isahovtyń aıtýynsha, jańa avtobýstar 3 aı boıy №12 marshrýtta qyzmet etetin bolady.
Atalǵan marshrýt Qazqstan qonaq úıinen Medeý taý shańǵysy kýrortyna deıingi qashyqtyqta júredi.
«Bul markanyń avtobýstary álem naryǵynda óziniń tıimdiligin kórsetti. Degenmen biz ony Almaty jaǵdaıynda tekserip kóremiz. Sondyqtan júktemeni anyqtaý úshin osy baǵyt tańdap alyndy. Almaty ákiminiń tapsyrmasy boıynsha qalada kólik reformasy aıasynda gazben júretin avtobýstarǵa qatysty qajetti ınfraqurylym jasalyp jatyr. Alataý aýdanynda 200 avtobýsqa arnalǵan avtopark qurylysy jolǵa qoıylǵan. Sondyqtan óndirýshiler tarapynan ınvestıtsııalyq qyzyǵýshylyq bar. Baǵasyna, sapasyna qatysty barlyq málimetter jınalǵan soń tasymaldaýshylar osy avtobýstardy alatyn bolady», - dedi ol.
«CNH Industrial» óńirlik menedjeri Roberto Bonzo avtobýstyń Almatyǵa Eýropadan ákelingenin jáne barlyq joǵary sapaly standarttarǵa saı ekenin aıtty.
«Eger Almaty tasymaldaýshylary tarapynan suranys bolsa, Qostanaı qalasyndaǵy zaýytta jasalyp, qurastyrylatyn otandyq avtobýstardy usynamyz», - dedi «SaryarkaAvtoProm» JShS-tiń basqarýshy dırektory Orýdj Nazarov.
Eske salsaq, №12 baǵytynda gazben júretin «Mercedes-Benz» markaly avtobýstar da testileýden ótip jatyr.
