Almatyda gazben júretin 600 avtobýs satyp alynady

ASTANA. QazAqparat – Almatyda gazben jáne elektr qýatymen júretin avtobýstar úlesi 46%-ke deıin artady. Bul týraly qala ákimi Erbolat Dosaev aıtty, dep habarlaıdy QazAqparat tilshisi.

«Qoǵamdyq kólikti ekologııalandyrý úshin gazben júretin 600 jańa avtobýs jáne kommýnaldyq park úshin 100 trolleıbýs satyp alynady. Ondaǵy 100 avtobýs bıyl shildede (qalǵan 500 avtobýs pen 100 trolleıbýs – jeltoqsanda) alynady. Sondaı-aq, shilde sońyna deıin 100 mektep avtobýsy satyp alynady», – dedi qala basshysy elordada ortalyq kommýnıkatsııalar qyzmetinde.

Buǵan qosa, osy jyldyń basynan bastap 5 jańa avtobýs baǵyty ashyldy.

Almaty oblysyndaǵy 200 myń turǵyny bar 89 eldi mekendi qamtyǵan 10 qala mańyndaǵy marshrýtty ashý josparǵa engen.

Qabyldanǵan sharalardyń nátıjesinde gazben jáne elektr qýatymen júretin avtobýstardyń úlesi 2023 jyly 46%-ke deıin artady, dızeldi avtobýstardyń úlesi 41%-ke deıin tómendeıdi.