Almatyda gazben jáne elektr qýatymen júretin avtobýstar sany artady
Memleket basshysy birneshe saǵattyq kólik keptelisteri azamattardyń densaýlyǵyna keri áser etip qana qoımaı, qala ekonomıkasy men ekologııasyna da aıtarlyqtaı zııan keltiretinin aıtqan bolatyn.
«Qoǵamdyq kólikterdiń tartymdylyǵyn dáıekti túrde arttyra otyryp, jeke kólikterdi paıdalanýdy azaıtý jaıyn oılastyrý kerek. Ol úshin metro jelisin keńeıtýdi jalǵastyrý qajet. Eskirgen jáne ekologııaǵa zııan keltiretin kólik túrlerinen bas tartý kerek. 2025 jyldan keıin Almaty kóshelerinde dızeldi avtobýstar qalmaýǵa tıis. Olardy gazben jáne elektr qýatymen júretin kólikter almastyrady. Almatyda ony tabysty damytýdyń mol tájirıbesi bar. Tranzıttik júk tasymalynyń basym bóligin Úlken Almaty aınalma jolyna kóshirý de qalaǵa oń áserin tıgizedi. Bul úshin 6 radıaldy jáne 4 ishki negizgi kóshe salý qajet», - dedi Memleket basshysy.
Bıyl Almatydaǵy qoǵamdyq kólikti ekologııalandyrý úshin gazben júretin 600 jańa avtobýs jáne kommýnaldyq park úshin 100 trolleıbýs satyp alý kózdelgen.
Qalalyq ákimdiktiń málimetinshe, jańa oqý jyly bastalǵanǵa deıin 100 jańa avtobýs qoldanysqa beriledi. Qazirgi ýaqytta qalalyq avtopark 30 avtobýspen tolyqty, qalǵan 70-i jaqyn arada kelýi tıis.
«Bul avtobýstar esebinen jyljymaly quram №37, 38, 38a jáne 201 marshrýttarda jańartylady. Ári №24, 125, 131 marshrýttarǵa avtobýstar qosylady, ıaǵnı qoldanystaǵy marshrýttar jańa avtobýstarmen tolyǵady», - dep habarlady ákimdikten.
Qalǵan 500 avtobýsty satyp alýǵa shart jasaldy.
Buǵan qosa, osy jyldyń basynan bastap 5 jańa avtobýs baǵyty ashyldy. Qabyldanǵan sharalardyń nátıjesinde gazben jáne elektr qýatymen júretin avtobýstardyń úlesi 2023 jyly 46%-ke deıin artady, dızeldi avtobýstardyń úlesi 41%-ke deıin tómendeıdi.
Aıta keteıik, jaqynda Almaty ákimdigi talapty oryndamaǵan jolaýshylar tasymaldaıtyn «Avtotransgaz» JShS kompanııasymen kelisimshartty buzdy.
2023 jyldyń 24 shildesinen bastap «Avtotransgaz» JShS qyzmet kórsetken segiz marshrýt tórt tasymaldaýshyǵa berildi. Almaty ákimdigi jumys kúni marshrýttardyń toqtaýyn boldyrmaý úshin osy kompanııanyń jolaýshylar tasymaly salasyndaǵy qyzmetin merziminen buryn toqtatýyna baılanysty osyndaı jedel shara qoldanýǵa májbúr boldy.
Buryn habarlanǵandaı, mindettemelerin oryndamaýyna baılanysty osy uıymǵa talap qoıylǵan. Kompanııanyń barlyq marshrýtynda tolyq qyzmet kórsetilmeı, tasymaldaý sapasyna teris áser etti. Jolaýshylar tarapynan avtobýstardyń jaı-kúıine, júris aralyǵyna jáne tehnıkalyq sebeppen qozǵalysqa shyqpaýyna qatysty qısyndy syn aıtyldy. Bul rette, ákimdiktiń sýbsıdııa tóleý jónindegi barlyq mindettemesi tolyq kólemde oryndaldy.
Almaty qalalyq mobıldilik basqarmasy qoldanystaǵy tasymaldaýshylar arasynda baǵyttardy ýaqytsha bólý boıynsha jedel sharalar qabyldady. Sonyń nátıjesinde 8 baǵyt qalanyń tórt tasymaldaýshysyna berildi. Qajet bolǵan jaǵdaıda jyljymaly birlikter kezeń-kezeńimen kóbeıtiledi.
Máselen, №112 marshrýtta «Almatyelektrotrans» JShS 5 avtobýstyń ornyna 10 avtobýs shyǵarady. Sonymen qatar, kommýnaldyq avtoparkke №126, 16 jáne №3 marshrýttar berildi, onda jelide tıisinshe 8, 9 jáne 2 avtobýs júredi.
«DýmanTranskom» kompanııasyna №29r (2 avtobýs) jáne №47 (12 avtobýstyń ornyna 16 avtobýs) baǵyttary berildi.
№29 marshrýt «Ekobas» jeke tasymaldaýshysyna berildi, ol jelige 12 avtobýs shyǵarady.
№85 marshrýtta endi «AvtoAlmatrans» JShS qyzmet kórsetedi, ol 10 avtobýsty iske qosty.
Endi Almatyda 24 kompanııa jolaýshylar tasymalymen aınalysady.
Almaty oblysyndaǵy 200 myń turǵyny bar 89 eldi mekendi qamtyǵan 10 qala mańyndaǵy marshrýtty ashý josparǵa engen.
