Almatyda gaz tasymaldaıtyn kólik jarylýdan ázer aman qaldy
ALMATY. QazAqparat – Almatynyń Bostandyq aýdanynda gaz tasıtyn kólik jaryla jazdady, dep habarlaıdy QazAqparat.
2 qańtar saǵat 15:20-de «101» qyzmetine Á. Kekilbaıuly kóshesinde benzın tasıtyn kóliktiń órtengeni týraly habar kelip tústi.
«Oqıǵa ornyna jaqyn mańdaǵy órt sóndirýshiler jóneltildi. Bul ýaqytta gaz tasymaldaıtyn kóliktiń júrgizýshisi, 1976 jyly týǵan Ońǵarbek Ospanov asyp-saspaı, jalyndy óz kúshimen sóndirip jatqan. Kýágerlerdiń aıtýynsha, jolaı ótip bara jatqan 4-5 avtokólik toqtap, olardyń júrgizýshileri tilsiz jaýdy aýyzdyqtaýǵa kómektesken», - dep málim etti tótenshe jaǵdaılar departamentinen.
7 mınýtta kelip jetken órt sóndirýshiler tsısternany gazben salqyndatýǵa kiristi. Júk kóligi ıesiniń jáne kómekke umtylǵan basqa da júrgizýshilerdiń batyl ári sheber áreketiniń arqasynda 10 tonnalyq aýyr júk kóligi jarylýdan aman qaldy.
Ospanov órt sóndirýshilerge jolda kele jatqanda-aq aspaptar paneli qatelikti kórsetkenin aıtty. Bir jamandyqtyń bolatynyn sezgen Ońǵarbek toqtap, gaz tasymaldaıtyn kóliktiń kabınasynyń astynan burqyrap shyǵyp jatqan tútindi kórgen. Ol tez arada akkýmýlıatordy óshirip, kabınany kóteredi de, kóliktiń janyp jatqan jerin sóndirýge kirisedi.
«Órt sóndirýshiler kelem degenshe taǵy bir jerden ot tutanǵan. Ekinshi órt sóndirgish quraldy qoldanýǵa týra keldi. Qyzyl jalyn tolyq sóndirildi. Keıin anyqtalǵandaı, mashınanyń motor bólimi qysqa tuıyqtalyp, 0,5 sharshy metr aýmaqta órt tutanǵan», - dep túsindirdi vedomstvodan.
