Almatyda gaz qubyryn jóndeý jumystaryna baılanysty avtokólikterdiń júrýi shekteledi
ALMATY. QazAqparat - Almatyda jerasty gaz qubyryn jóndeý jumystaryna baılanysty Papanın kóshesinde avto, motokólikterdiń júrýi shekteledi, dep habarlaıdy QazAqparat tilshisi.
15 tamyz - 15 qarasha aralyǵynda Túrksib aýdanynyń Papanın kóshesiniń boıynda, atap aıtqanda, kósheniń Belıakov kóshesimen qıylysynan bastap Rýstavelı kóshesiniń qıylysyna deıin avto, motokólikterdiń júrýi shekteledi.
«Atalǵan jumys Almaty qalasynyń gaz bólý júıesiniń ótkizý múmkindigin ulǵaıtý, jerasty gaz qubyrlaryn jańalaý maqsatynda júrgizilip jatyr. Bul shara óz kezeginde apattyq jaǵdaılardyń azaıýyna jáne megapolıs halqyna úzdiksiz gaz berý múmkindiginiń artýyna septigin tıgizedi», - dep habarlady «QazTransGazAımaq» AQ Almaty óndiristik fılıaly.Kompanııanyń baspasóz qyzmeti turǵyndardy baǵyt-baǵdardy aldyn-ala oılastyryp, ýaqytsha qolaısyzdyqtarǵa túsinistikpen qaraýǵa shaqyrdy.
