Almatyda gaz berý qyzmetiniń ókilderine qatysty sot úkimi shyqty
ALMATY. QazAqparat - Almatyda «QazTransGaz» AQ qyzmetkerlerine qatysty sot úkimi shyqty. Bul týraly qalalyq sottyń baspasóz hatshysy Qýandyq Eshimet habarlady.
Aıta keteıik, qaıǵyly oqıǵa «Áıgerim» shaǵyn aýdanyndaǵy jeke úıde bolǵan. Gaz montajdaý jumystarynyń qate júrgizilgeni saldarynan jarylys bolyp eki balasymen 23 jastaǵy kelinshek tirideı órtenip ketken bolatyn.
1,5 jylǵa jalǵasqan sot protsesi barysynda "Vıktorııa Haýz" PIK tóraǵasy men jobalaýshy men dánekerleýshi jaýapqa tartyldy.
Olar QR QK 104-baby men 204-babyna sáıkes aıypty dep tanyldy.
Sondaı-aq, «Almaty gaz jelisi» AQ qyzmetkeri de Qylmystyq kodekstiń 25- babyna sáıkes aıypty dep tanyldy.
Úkimdi Alataý aýdandyq sotynyń sýdıasy Murat Sholpanqulov shyǵardy.
«Sottalýshy Denıs Krechetov, Aleksandr Cheskov, Tımýr Turdyaqynov men Qarlyn Tursynov 3 jyl 2 aıǵa bas bostandyǵynan aıryldy. Olar jazasyn qonys kolonııasynda óteıtin bolady. Olga Pelıcheva 3 jylǵa bas bostandyǵynan aıryldy», - dedi Qýandyq Eshimet.
Sondaı-aq, sot «QazTransGaz Almaty» japa shegýshiniń otbasyna 17 mln. 891 myń teńge kóleminde moraldyq shyǵyn tóleıtin boldy.
Basqa aıyptalýshylar qaıǵy jutqan otbasyǵa 12 mln. teńgeden ótemaqy tóleýge májbúrlendi.
Sýdıanyń aıtýynsha, órt qaýipsizdigin tekserý uıymynyń basshysy bola tura Pelıcheva jumys isteýge tıisti lıtsenzııasy joq merdiger kompanııadan atalǵan úıdi gaz qubyryna qosý týraly qujatyn qabyldap alyp, «QazTransGaz» AQ-ǵa tapsyrǵan.
Óz kezeginde «QazTransGaz» gaz qubyryn durys montajdalǵanyn teksermeı gaz berip jibergen. Sonyń saldarynan 2013 jyldyń 25 qazanynda úıde qatty jarylys bolyp, úsh adam ajal qushqan.
Saraptama qorytyndysy kórsetkendeı, úıde gaz qubyrynyń japqyshy durys josparlanbaǵan bolyp shyqty.
