Almatyda gaz arzandady

ALMATY. QazAqparat - Almatyda jylý, elektr qýaty, sý jáne káriz júıesiniń tarıfteri jyl sońyna deıin ózgermeıdi, al gaz quny 4 paıyzǵa tómendeıdi. Bul týraly «Nur Otan» partııasynda ótken saıası keńeste aıtyldy, dep habarlaıdy QazAqparat tilshisi.

Almaty ákimi Baýyrjan Baıbek qala turǵyndary úshin eń ózekti máselelerdiń biri - kommýnaldyq qyzmetterge tarıf taǵaıyndaý bılik partııasynyń baqylaýynda ekenin aıtty.

Búginde 1,5 mln-ǵa jýyq almatylyq jergilikti bıýdjet esebinen kommýnaldyq qyzmetterdi burynǵy baǵada tutynýda. Kommýnaldyq tólemderi jalpy tabysynyń 10%-nan asatyn turǵyndarǵa kómek retinde qarajat bólindi.

«Memleket basshysy tarıfty negizsiz joǵarylatýǵa jol bermeýdi tapsyrdy. Bul adamdardyń tirshiligine, kásipkerlerge, baǵalarǵa, tikeleı áser etedi. Osy maqsatta qalalyq prokýratýra monopolıster arasynda aýqymdy tekserý júrgizdi. Nátıjesinde baǵany sebepsiz kóterý faktileri anyqtaldy. Dereý shara qoldanylyp, 1,5 mln- ǵa jýyq azamattardyń quqyqtary qorǵaldy. Monopolısterge tutynýshylarǵa 4,7 mlrd teńgege jýyq ótemaqy tóleý mindeti júkteldi. Kommýnaldyq qyzmet qunyn arttyrýǵa eshqandaı da negiz joq. Bizdiń almatylyqtar artyq tólem jasamas úshin kez kelgen zańsyz áreketter toqtatylady. Prezıdenttiń tapsyrmasy bar jáne ol oryndalady», - dedi Baýyrjan Baıbek.

Tarıf jaıyn baıandaý barysynda Almaty prokýrory Berik Júıriktaev qalanyń basty qadaǵalaýshy organdary júrgizgen tekserý barysynda birqatar monopolııalyq sýbektilerdiń shyǵyndardy negizsiz ósirgeni jáne ınvestıtsııalyq baǵdarlamalardy oryndamaý jaıttary anyqtalǵanyn aıtty.

«Biz «Almatyenergosbytta» elektr qýatyn retteý qyzmetine tarıftik smetada jarııalanǵan somanyń 70%, al amortızatsııalyq aýdarymdar boıynsha 30% ǵana jumsalǵanyn dáleldedik. Energosbyt óz kinásin moıyndap, jaýapkershilikke tartyldy. «Alataý Jaryq Kompanııasy» tótenshe retteý sharalaryn engizý esebinen elektr qýatyn berý tarıfyn kóterdi. Keıinirek anyqtalǵandaı, olar bul sharany tótenshe jaǵdaı sanatyna jatpaıtyn kishigirim avarııalar men aǵymdaǵy jóndeý kerektigimen negizdegen. Bizdiń talaptarǵa sáıkes, ýákiletti organ óz sheshiminiń kúshin joıdy. Qabyldanǵan sharalar arqasynda 2,17 mlrd teńge shyǵyndardy óteý úshin ótemaqy tarıfteri engizildi. 2,83 mlrd teńgege bolashaq shyǵynnyń aldyn aldyq. Aǵymdaǵy tarıf 5,6%-ǵa tómendedi», - dedi Berik Júıriktaev.

Qala prokýrorynyń aqparaty boıynsha, buǵan qosa "QazTransGaz Aımaq" tekseristen ótken. Munda ınvestıtsııalyq baǵdarlamanyń keıbir jumystary atqarylmaǵany belgili boldy. Prokýrorlyq sharalardyń arqasynda 425 mln teńge ótemaqylyq tarıf engizildi.