Almatyda ǵasyr indetine shaldyqqandardyń 70%-i dárimen qamtyldy
ALMATY. QazAqparat - Almatylyq dárigerler Adamnyń ımmýn tapshylyǵy vırýsymen (AITV) ómir súretin adamdardy antıretrovırýstyq terapııamen qamtýdy 74% -ke deıin arttyrdy, dep habarlaıdy QazAqparat tilshisi.
Dárigerlerdiń aıtýynsha, búginde antıretrovırýstyq terapııa Juqtyrylǵan ımmýn tapshylyǵy sındromyn aldyn alýdyń (JITS) jáne AITV+ dertinen adamdardyń densaýlyǵyn saqtap qalýdyń jalǵyz joly.
Bul terapııanyń arqasynda 30 jyldyń ishinde AITV ólimge ákeletin qaýipti dertten sozylmaly túrge ótti. Antıretrovırýstyq terapııanyń arqasynda aýrýdyń damýyn qadaǵalaýǵa bolatyndyǵyn Dúnıejúzilik densaýlyq saqtaý uıymy moıyndady.
Júrgizilgen zertteýler AITV-men ómir súretin adamdarda antıretrovırýstyq terapııany erterek bastaý, opportýnıstik ınfektsııa aýrýlaryn jáne ólim kórsetkishterin tómendetetindigin anyq kórsetti.
Qazirgi ýaqytta DDU sarapshylary antıretrovırýstyq terapııany, SD4 kletkalarynyń sanyna jáne aýrýdyń klınıkalyq kezeńine qaramastan barlyq AITV-sy bar júkti áıelderge de bastaýdy usynyp otyr.
AITV-men aýyrǵan adamdarǵa preparattardy satyp alý qajet emes, ony olar JITS Ortalyǵynan tegin alady.
Sonymen qatar, birneshe jyl buryn atalǵan preparattardyń kúnine 4-6 tabletkasyn ishý kerek bolǵan, ol keıbir qıynshylyqtarǵa ákelgen bolsa, al qazir bir nemese eki tabletkamen shektelýge bolady. Búginde Ortalyqtaǵy patsıentterdiń kópshiligi jańa kestemen emdelýde.
«Keıbir naýqastar ART-preparattaryn qoldanýdan qorqady, olardyń jaǵymsyz áserleri bar dep oılaıdy, al sońǵy shyqqan dáriler ony teriske shyǵarýda. Qutqarý terapııasynyń arqasynda bizdiń patsıenterde vırýstyq júkteme tómendeýde, nátıjesinde aýrý órshýin toqtatady» - deıdi , Almaty qalasy JITS-tiń aldyn alý jáne oǵan qarsy kúres ortalyǵynyń bas dárigeri Talǵat Bapıev.
